2025-рэ илъэсым машIом зыкъыштэным ищынагъо зыщыIэгъэ лъэхъаным фэхъугъэ кIэуххэр, ошIэ-дэмышIагъэ зыхэлъ тхьамыкIагъохэм цIыфхэр ащыухъумэгъэнхэр, машIом пэшIуекIогъэнымкIэ Къэралыгъо къулыкъум ифитыныгъакIэхэр гъэцэкIагъэ зэрэхъухэрэр — ахэр ыкIи нэмыкI Iофыгъохэр ары республикэм ошIэ-дэмышIагъэ зыхэлъ тхьамыкIагъохэр къыщымыгъэхъугъэнхэмкIэ, машIом зыкъымыштэнымкIэ Комиссием изэхэсыгъо зыщатегущыIагъэхэр.

Адыгеим и ЛIышъхьэу КъумпIыл Мурат Iофтхьабзэр зэрищагъ. Ащ хэлэжьагъэх АР-м и Къэралыгъо Совет – Хасэм и Тхьаматэу Владимир Нарожнэр, федеральнэ инспектор шъхьаIэу Сергей Дрокиныр, АР-м и Прокуратурэ, хэгъэгу кIоцI IофхэмкIэ Министерствэм, Урысыем щынэгъончъэнымкIэ и Федеральнэ къулыкъу игъэIорышIапIэу Адыгэ Республикэм щыIэм, Урысыем ошIэ-дэмышIэ IофхэмкIэ и Министерствэ игъэ­IорышIапIэ, нэмыкI федеральнэ къулыкъухэм яIэшъхьэтетхэр, муниципалитетхэм япащэхэр.
Урысыем ошIэ-дэмышIэ IофхэмкIэ и Министерствэ игъэIорышIапIэу Адыгеим щыIэм ипащэу Станислав Илющенкэм къызэриIуагъэмкIэ, 2025-рэ илъэсыр къызихьагъэм къыщыублагъэу гъогогъу 1614-рэ республикэм машIом зыкъыщиштагъ. Ар икIыгъэ илъэсым елъытыгъэмэ, процент 15-кIэ нахь макI. Ау я 4-рэ, я 5-рэ классхэм ахалъытэрэ машIохэм япчъагъэ зэрэхэхъуагъэр къыхигъэщыгъ. Анахьыбэрэ машIом зыкъыштагъэу зыщагъэунэфыгъэхэр Шэуджэн (процент 72-кIэ нахьыбэ хъугъэ) ыкIи Кощхьэблэ (процент 22-кIэ нахьыбэ хъугъэ) районхэр ары. «Термическэ точкэкIэ» зэджэгъэхэ гуадзэм ишIуагъэкIэ машIом гъогогъу 415-рэ зыкъыштагъэу агъэунэфыгъ ыкIи агъэ­кIосэжьыгъ. Ахэм нэбгыри 9 ахэкIодагъ, 7-мэ фыкъуагъэ афэхъугъ, къагъэнэжьыгъэр 30. Сомэ миллион 338-рэ фэдиз зытефэщт мылъку къызэтырагъэнэн алъэкIыгъ.
Мэкъумэщ мэхьанэ зиIэ чIыгухэм гъогогъу 23-рэ машIор ащагъэкIосэ­жьыгъ. Лажьэ зиIэ нэбгырэ 16-мэ административнэ пшъэдэкIыжь арагъэхьыгъ. Фитыныгъэ ямыIэу гъогогъуи 170-м ехъурэ хэкIхэр агъэстыгъэхэу, машIохэр ашIыгъэхэу агъэунэфыгъ.

АР-м мэзхэмкIэ и ГъэIорышIапIэ ипащэ игуадзэу Сергей Гавришовым къызэриIуагъэмкIэ, мы илъэсым мэз чIэгъхэм машIом гъогогъуи 3-рэ закъы­щиштагъ. ЧIыгумкIи космосым ылъэныкъокIи машIом зимыушъомбгъуным лъыплъэнхэм иамал яIагъ. Адыгеим икъулыкъоу мэзхэм машIом закъыщимыштэным фэгъэзагъэмрэ бэджэндэу чIыгур зыштагъэхэмрэ яамал зэхэлъэу мэзхэр машIом щыухъумэгъэнхэм епхыгъэ Iофыгъохэм анаIэ атырагъэты.
Республикэм и ЛIышъхьэ анахьэу анаIэ зытыраригъэдзагъэхэм ащыщ машIом зыкъемыгъэштэгъэным ыкIи ар гъэкIосэгъэным афэгъэзэгъэ къулыкъу­хэм язэтегъэпсыхьан тапэкIи нахь дэгъоу шIыгъэныр.
«МашIохэм зыкъамыштэным пае Iофтхьабзэу зетхьэхэрэр джыри нахь дгъэлъэшынхэ фае. ТынаIэ лъэшэу атедгъэтын фае къулыкъу гъэнэфагъэхэм, джырэ уахъэм диштэрэ техникэмрэ Iэмэ-псымэхэмрэ мэшIогъэкIосэ подразделениехэм икъоу аIэкIэтымыгъахьэхэ хъущтэп. Ащ нэмыкIэу мэкъумэщ мэхьанэ зиIэ чIыгухэм машIом закъыщиштэныр къызыхэкIырэр икъоу зэхэфыгъэн, пындж уарзэм зэрэдэзекIощтхэмкIи уахътэм диштэрэ шIыкIэ амалхэр къыз­IэкIэгъэхьэгъэнхэ фае», — къы­Iуагъ КъумпIыл Мурат.
2025-рэ илъэсым цIыфхэм якъэухъу­мэнкIэ ыкIи ошIэ-дэмышIагъэ зыхэлъ тхьамыкIагъохэр къэмыгъэхъугъэнхэмкIэ, джащ фэдэу 2026-рэ илъэсым зэшIуахын фэе пшъэрылъхэмкIэ къэгущыIагъ Адыгэ Республикэм цIыфхэм якъэухъумэнкIэ ыкIи ошIэ-дэмышIагъэ зыхэлъ IофхэмкIэ и Комитет итхьаматэу Вячеслав Лотаковыр. Ащ къызэрэхигъэщыгъэмкIэ, федеральнэ ыкIи шъолъыр гупчэ зэфэшъхьафхэм а лъэныкъомкIэ Iоф зышIэщтхэм ягъэхьазырын ащыкIуагъ. Нэбгырэ 380-м ехъу рагъэджагъ. Щынэгъончъэ­ным ипрограммэхэм кIэлэеджэкIо ыкIи студент мин 87-м ехъу къызэлъаубы­тыгъ.
2026-рэ илъэсым зэшIохыгъэн фэе пшъэрылъхэм къатегущыIэзэ, Адыгеим и ЛIышъхьэ къыхигъэщыгъ зэрэрагъа­джэхэрэр нахьышIоу зэхэщэгъэн, мылъкум ылъэныкъокIэ ахэр зэрэзэтегъэ­псыхьагъэхэри нахь дэгъу шIыгъэн зэрэфаер. ОшIэ-дэмышIагъэ зыхэлъ IофхэмкIэ Министерствэм игъэIорышIапIэу Адыгэ Республикэм щыIэм иIофы­шIэхэр хэлажьэхэзэ муниципалитетхэм семинархэр нахьыбэрэ ащызэхэщэгъэн фае.
Ащ нэужым машIом пэуцужьыгъэнымкIэ Къэралыгъо къулыкъум къыфэгъэзагъэ хъугъэ полномочиехэр гъэцэкIагъэ зэрэхъухэрэм хэплъагъэх. ГущыIэм пае, цIыфхэм якъэухъумэнкIэ, ошIэ-дэмышIагъэ зыхэлъ тхьамыкIагъохэм якIэуххэр дэгъэзыжьыгъэнхэмкIэ къулыкъухэм къэбарыр нахь игъэкIотыгъэу зэIэкIагъэ­хьан, машIом пэуцужьыгъэнымкIэ ыкIи цIыфхэр къэгъэнэжьыгъэнхэмкIэ Iоф­шIэнэу агъэцакIэрэм зырагъэушъом­бгъун фае. Зэхэсыгъом хэлажьэхэрэм 2026-рэ илъэсым Комиссием Iофэу ышIэщтым иплан аухэсыгъ.
АР-м и ЛIышъхьэ ипресс-къулыкъу къытырэ къэбархэмкIэ
Тхьаркъохъо Сафыет.