«Лъапсэхэм къафэгъэзэжьыгъэныр — зыужьыжьыным игъогу» зыфиIорэ шъолъыр фестивалыр Шэуджэн районым щыкIуагъ.

2024-рэ илъэсым Мыекъопэ районым ипсэупIэу Северо-Восточные Сады фестивалыр зыщызэхащэм, Шэуджэн районым къикIыгъэ этнотеатрэу «Мэрджанэм» фестивалым и Гран-при къы­хьыгъагъ. Ары мыгъэрэ Iофтхьабзэр Хьакурынэхьаблэ зыкIыщырагъэкIокIыгъэр. Лъэпкъ культурэм и Гупчэрэ Адыгэ Республикэм культурэмкIэ и Министерствэрэ ащ кIэщакIо фэхъугъэх.
1997-рэ илъэсым къыщыублагъэу Iофтхьабзэр тишъолъыр ичIыпIэ зэфэшъхьафхэм ащырагъэкIокIы. Лъэпкъ зэфэшъхьафэу Адыгеим щыпсэухэрэм якультурэ щыщ Iахьхэр, шэн-хабзэхэр къэIэтыжьыгъэнхэр япшъэрылъэу фестивалыр я 28-у республикэм щызэхащэ.
Район пэпчъ апэрэ едзыгъор щы­кIуагъ. Анахь дэгъухэу къыхахыгъэхэр республикэ фестивалым хэлэжьагъэх. Культурэм иучреждениехэу Адыгеим икъоджэ псэупIэхэм адэтхэм ялIыкIохэр ащ щызэнэкъокъугъэх. Мыекъопэ, Джэ­джэ, Шэуджэн, Кощхьэблэ, Тэхъутэмыкъое, Красногвардейскэ, Теуцожь районхэм, къалэу Мыекъуапэ ыкIи Адыгэ­къалэ къарыкIыгъэ театральнэ купхэм къэгъэлъэгъон гъэшIэгъонхэр къашIы­гъэх.
Шэуджэн район администрацием ипащэу Аулъэ Рэщыдэ шIуфэс гущыIэхэмкIэ фестивалыр къызэIуихызэ, Iофтхьабзэм мэхьанэшхо зэриIэр хигъэунэфыкIыгъ.
Iофтхьабзэм къеблэгъагъэхэм за­къы­фигъэзагъ Адыгеим культурэмкIэ иминистрэ игуадзэу Кушъу Светланэ:
— Мы фестивалыр лъэпкъ фэIо-фашIэхэм афэгъэхьыгъэ Iоф­тхьабзэу щыт. Гухэлъ шъхьаIэу зэхэщакIохэм яIэр лъэпкъэу тиреспубликэ исхэм яшэн-хэбзэ зэхэтыкIэхэр зыфэдагъэхэр ыкIи непэ дунаим зэрэхэзагъэхэрэр къагъэлъэгъоныр, ахэр лIэужыкIэм щымыгъупшэнхэм пае лъагъэкIотэнхэу ары. Непэрэ фестивалым лъэпкъ зэфэшъхьафмэ яискусствэ ыпэкIэ лъегъэкIуатэ, зыужьыжьыным игъогу фещэх.
Зэман чыжьэмэ къапхырыкIыгъэ орэдыжъхэр, лъэпкъ шэн-хабзэхэр, жэ­ры­Iо народнэ творчествэр ыкIи зекIо­кIэ-шIыкIэхэр къызхэщырэ къэгъэлъэ­гъон кIэкIхэр творческэ куп зэфэшъхьафхэм къашIыгъ.
Адыгэ зекIокIэ-шIыкIэм, лъэпкъ джэгум щыщ Iахьэу «Ныо ежьэжьыр» Адыгэкъалэ илIыкIохэм гъэшIэгъонэу къагъэлъэгъуагъ. ИжъыкIэ шэн-зекIуакIэу адыгэхэм ахэлъыгъэхэр непэрэ мафэм къыхэгъэхьажьыгъэнхэр фестивалым ипшъэрылъхэм ащыщ. Тэхъутэмыкъое районым илIыкIохэм нысакIэр апэрэу псыхьэ зэращэщтыгъэр къагъэлъэгъуагъ.
Къэзэкъ кIалэр ижъыкIэ зэрэпсэлъы­хъощтыгъэр, адыгэ джэгум щыщ зы Iахьэу «Iэнэ гъэуджыр», «Яблочный спас» зыфиIорэ мэфэкIым къешIэкIыгъэ фэIо-фашIэхэр ыкIи нэмыкIыбэ теат­рэхэм къагъэлъэгъуагъэх.
Лъэпкъхэм язэпхыныгъэ гъэпытэгъэ­нымкIэ, лIэужыкIэр лъэхъаным диштэу пIугъэнымкIэ, цIыфхэм зэгурыIоныгъэ азыфагу илъынымкIэ фестивалым имэхьанэ зыкъеIэты. Къашъохэм, орэдхэм, фольклорым къыхэхыгъэ къэгъэлъэгъон­хэм, гущыIэ щэрыоу ащ щыIугъэхэм зэхахьэр къагъэдэхагъ.
ШъэуапцIэкъо Аминэт зипэщэ осэшI купым зэриухэсыгъэмкIэ, Гран-при фагъэшъошагъ Шэуджэн районым ипсэупIэу Чернышовым итворческэ куп. Апэрэ чIыпIэр Гъобэкъуае инароднэ-драматическэ купэу «Гунэс» къыдихыгъ. Шэу­джэн районым ипащэ ихэушъхьафыкIыгъэ тын фигъэшъошагъ Красногвардейскэ районым иныбжьыкIэ театральнэ купэу «Наследием».
Фестивалым къызэрэщыхагъэщыгъэу, культурэу хэгъэгум иIэр зыкIыныгъэм зэрипхыщт, лIэужхэм гъогу тэрэз арагъэлъэгъущт. Лъэпкъ пэпчъ икультурэ къаухъумэзэ, Урысыем культурэ хэхыгъэ щызэрахьан зэрэфаер щыIэныгъэм къы­гъэуцурэ пшъэрылъхэм ащыщ хъущт.
Лъэпшъыкъо
Фатим.