Адыгэ Республикэм и Лышъхьэу КъумпIыл Мурат Красногвардейскэ районым щыIагъ, псэупIэу Садовэм врач амбулаториеу щашIыгъэм икъызэIухын епхыгъэ Iофтхьабзэм хэлэжьагъ. Лъэпкъ проектэу «ГъэшIэ кIыхьэр ыкIи чаныр» зыфиIорэм ишъолъыр проектэу «Псауныгъэм икъэухъумэн исистемэ гъэкIэжьыгъэныр» зыцIэм къыдыхэлъытагъэу псэуалъэр агъэпсыгъ.

А Iофтхьабзэм хэлэжьагъэх федеральнэ инспектор шъхьаIэу Сергей Дрокиныр, АР-м и Къэралыгъо Совет — Хасэм и Тхьаматэ игуадзэу Iэщэ Мухьамэд, министрэхэм я Кабинет и Тхьаматэ игуадзэу, финансхэмкIэ министрэу Виктор Орловыр, псауныгъэм икъэухъумэнкIэ министрэу Мэрэтыкъо Рустем, муниципальнэ образованиеу «Красногвардейскэ районым» ипащэу Гъубжьэкъо Темур, АР-м икъэралыгъо бюджет учреждениеу «Стройзаказчикым» иIэшъхьэтетэу Хьаджымэ Ас­лъан.
2024-рэ илъэсым къоджэдэсхэм медицинэ IэпыIэгъур нахь икъоу къызфагъэфедэн алъэкIыным пае амбулаторием ишIын рагъэжьэгъагъ. Ащ пэIуагъэ­хьанэу сомэ миллион 36-рэ къыхагъэ­кIыгъагъ. Медицинэ Iэмэ-псымэхэр ыкIи мебелыр къэщэфыгъэнхэм сомэ миллиони 5 Iэпэ-цыпэ пэIуагъэхьагъ. Квадрат метрэ 420-рэ хъурэ псэуалъэр чэщ-зымафэм нэбгырэ 50-мэ яфэIо-фашIэхэр афэгъэцэкIэгъэнхэм тегъэпсыхьагъ. КIэлэцIыкIухэм ыкIи зыныбжь хэкIотагъэхэм зыщяIэзэхэрэ чIыпIэр, мэфэ стационарыр, процедурэхэр зыщашIыхэрэ кабинетхэр, нэмыкIхэри ащ къыхеубытэх. КIэлэцIыкIу отделением врач-педиатрэм щыригъэблэгъэщтых. Нахьыжъхэм зафагъэзэн алъэкIыщт терапевтым, гинекологым, цашIэм.
Адыгеим и ЛIышъхьэ псэолъакIэр къыплъыхьагъ, медицинэм иIофышIэхэм ыкIи къоджэдэсхэм гущыIэгъу афэхъугъ. ПсэупIэм ынаIэ къызэрэтыригъэтырэм, къоджэдэсхэм ящыIакIэ нахьышIу хъунымкIэ зэхъокIыныгъэ инхэм апае КъумпIыл Мурат зэрэфэразэхэр ахэм къаIуагъ. Республикэм и ЛIышъхьэ къо­джэдэсхэм зафигъазэзэ къыхигъэщыгъ гъэпсын IофшIэнхэм нахь чанэу ахэлэжьэнхэ, чIыпIэ зыгъэIорышIэжьыным икъулыкъухэм ягъусэхэу зэтегъэпсыхьан Iофыгъохэр зэшIуахынхэ, социальнэ мэхьанэ зиIэ проектхэр щыIэныгъэм щыпхырыщыгъэнхэм яIахь хашIыхьан зэрэфаер.
Медицинэм иIофышIэхэм задэгущыIэм АР-м и ЛIышъхьэ анахьэу ынаIэ зытыридзагъэр диспансеризацием иIофыгъо­хэр ары. КъумпIыл Мурат пшъэрылъ зэрафишIыгъэм тетэу а лъэныкъом епхыгъэу врач куп шэкIогъум и 28-м амбулаториякIэм къэкIощт, цIыфхэм япсауныгъэ изытет ауплъэкIущт. ШэкIогъум и 27-м псэупIэу ХъымыщкIэй дэс­хэм япсауныгъэ изытет ауплъэкIущт, шъолъыр Iофтхьабзэу «ЦIыфхэр бэгъашIэ хъунхэм фэлэжьэрэ медицинэр» зыфиIорэм къыдыхэлъытагъэу ар рекIо­кIыщт.

Адыгеим и ЛIышъхьэ АР-м псауныгъэм икъэухъумэнкIэ и Министерствэ пшъэрылъэу фишIыгъэр зэпхыгъэр къуа­джэхэм медицинэм иIофышIэхэр нахьыбэу ащылэжьэнхэмкIэ IофшIэныр гъэлъэ­шыгъэныр ары. Программэ гъэнэфагъэ­хэу «Земский доктор» ыкIи «Земский фельдшер» зыфиIохэрэм атетэу ар зэшIохыгъэ хъущт.
Адыгеим и ЛIышъхьэ къызэрэхигъэщыгъэмкIэ, лъэпкъ проектыкIэу «ГъэшIэ кIыхьэр ыкIи чаныр» зыфиIорэм тегъэ­псыхьагъэу псауныгъэм икъэухъумэнкIэ къулыкъум игъэкIэжьынкIэ Iофтхьабзэхэр зэрахьащтых, медицинэ псэолъакIэхэр ашIыщтых, жъы хъугъэхэр агъэцэкIэ­жьыщтых.
Мы илъэсым ыкIэм ехъулIэу къалэу Мыекъуапэ, Адыгэкъалэ, Кощхьэблэ ыкIи Тэхъутэмыкъое районхэм, псэупIэу Джаджэм адэтхэ сымэджэщхэмрэ IэзапIэхэмрэ зычIэтхэ уни 5-м игъэкIотыгъэ гъэцэкIэжьынхэр ащарашIылIэщтых. Джащ фэдэу мы илъэсым къоджэдэсхэм апае врач амбулатории 6 къызэIуахыщт. Красногвардейскэ районымкIэ псэупIэу Садовэм нэмыкIэу Тэхъутэмыкъое районымкIэ къуаджэхэу Афыпсыпэ, Щынджые, Мыекъопэ районымкIэ псэупIэхэу Абдзэхэхьаблэ, Победэм, Краснооктябрьскэм, къутырэу Северо-Восточные Сады къащызэIуахыщтых.
ШIугу къэтэгъэкIыжьы: къэралыгъо программэхэмрэ лъэпкъ проектхэмрэ пхырыщыгъэ зэрэхъухэрэм ишIуагъэкIэ мы аужырэ илъэси 8-м Адыгеим сымэ­джэщи 4, IэзэпIи 5, фельдшер-мамыку IэзэпIэ 33-рэ ыкIи врач амбулатории 3 къыщызэIуахыгъэх.
АР-м и ЛIышъхьэ ипресс-къулыкъу къытырэ къэбархэмкIэ
Тхьаркъохъо Сафыет.