Адыгэ республикэ гим­назием ия 10-рэ класс иеджакIохэр «Адыгэ макъэм» ихьэкIагъэх. Сэнэхьатхэм нэIуасэ зэрафашIыхэрэм къыды­хэлъытагъэу адыгабзэмрэ литературэмрэкIэ кIэлэегъаджэу Темзэкъо Маринэ ахэр гъэзетым къыщагъэх.

НыбжьыкIэхэр тиIофшIапIэ апэрэу къеблэгъагъэх. ЫпэрапшIэу редактор шъхьаIэу МэщлIэкъо Саидэ ахэм аIу­кIагъ. НыбжьыкIэхэр бэу къызэрэтфакIохэрэр, ар зэрэгуапэр къыхигъэщыгъ ыкIи гъэзетым иIофшIэн зыфэдэм кIэкIэу щигъэ­гъозагъэх. Шъхьадж сэнэхьатэу зыфе­джэнэу фаемкIэ яупчIыгъ. Зыми журналистикэр къыхимыхыгъэми, еджэпIэ чIэкIыгъор къэсыфэ зыгорэхэм яеплъыкIэ зэблахъуни, адыгэ журналистикэр ныбжьыкIэхэмкIэ къагъэбаинэу зэрэгугъэрэр къыхигъэщыгъ. Щысэу къафихьыгъэх Адыгеим ижурналистхэм я Союз лъэпкъ журналистикэм иеджапIэу зэхищагъэм къэкIорэ кIэлэеджакIохэр. Ахэр зэрэлажьэхэрэм, ныбжьыкIэхэм Iоф зэрадашIэрэм ыкIи пшъэрылъэу зыфагъэ­уцужьхэрэм хьакIэхэр щигъэгъозагъэх проектым дэлажьэу, Урысыем изаслуженнэ журналистэу, «Адыгэ макъэм» иредактор шъхьаIэ игуадзэу Тэу Замирэ. ЗэдэгущыIэгъум къыкIэлъыкIоу кIэлэеджа­кIохэм гъэзетым Iоф щызышIэхэрэмрэ илэжьэпIэ унэрэ нэIуасэ афашIыгъэх, зичэзыу гъэзет номерым игъэхьазырын зэрэкIорэр арагъэлъэгъугъ.
Анцокъо Ирин.