Республикэм икъэлэ шъхьаIэ игупчэ къэгъэлъэгъон гъэшIэ­гъон къыщызэIуахыгъ.

«Мыекъопэ ныбжьыкI. Ны-тыхэм сырягъусэу зы IофшIэгъу маф» зыфиIорэр урамэу Краснооктябрьскэм, къэлэ зыгъэпсэфыпIэм дэжь, щагум, щыгъэ­псыгъ.
Сэнэхьатхэм язэмылIэужыгъуагъэ сурэтхэм къащыгъэлъэгъуагъ. КIэлэцIыкIухэу ны-тыхэм ялэжьапIэхэм зы Iоф­шIэгъу мафэ ащызыгъэкIуагъэхэр ахэм арытых. Унэгъо шэн-хабзэхэм, IофшIэным лъытэныгъэ афэпшIыным, ахэр пшIо­гъэшIэгъонынхэм имэхьанэ ащкIэ къырагъэлъэгъукIыныр зэхэщакIохэм ягухэлъ.
— Сэнэхьатыр ашIогъэшIэгъоныныр, IофшIэным уасэ фашIыныр ыкIи укъызщыхъугъэ къалэм шIуагъэ къыфэпхьын шIоигъоныгъэр къызщежьэрэр унагъор ары. Мыекъуапэ неущ зыфэдэщтыр бэкIэ елъытыгъ ныбжьыкIэхэм непэ ахатлъхьэ­рэм, — къыIуагъ къэлэ администраци­ем ипащэу Геннадий Митрофановым.
Мы гъэлъэгъуапIэр Мыекъуапэ изекIо IункIыбзэ зегъэушъомбгъугъэнымкIэ зичэзыу лъэбэкъу. Джы ащ ишIуагъэкIэ исурэтышIхэмрэ исурэттеххэмрэ ямы­шIы­кIэ гъэлъэгъуапIэ яIэ хъугъэ. Ащ ихьа­тыркIэ республикэм итворческэ цIыфхэм яIэпэIэсэныгъэ зылъэгъурэр нахьыбэ хъущт. КъэIогъэн фае, IофшIагъэхэр зыдагъэуцурэ чIыпIэхэр чIына­лъэм диштэу гъэпсыгъэх. Ахэм адэт унэхэм Мыекъуапэ иархеологие епхыгъэ псэушъхьэхэр атешIыхьагъэх: быгъухэр, шъыхьэхэр, аслъанхэр, адыгэ тхыпхъэ­хэр, къалэм итамыгъэу мыIэрысэр. Гъэ­лъэгъуапIэм нэфынэ ращэлIэщт. Ма­фэм имызакъоу, чэщыми IофшIагъэхэм уяплъын плъэкIыщт.
— Мыщ фэдэ чIыпIэхэу, лъэс къэ­кIухьанымрэ культурэм улъызыгъэIэсыхэрэмрэ зыщызэхэбгъэщэнхэ плъэ­кIыхэрэр нахьыбэ хъунхэм тегугъущт, — къащиIуагъ АР-м и ЛIышъхьэ ихъытыу нэкIубгъохэм.

Анцокъо Ирин.