ШэкIогъу мазэм проектэу «Творческая эко-перезагрузка станицы Курджипской» зыфиIорэр ыкIэм фэкIо.

Ащ ишIуагъэкIэ кIэлэеджа­кIохэр экологием, искусствэм афэщагъэ мэхъух, зыщыпсэу­хэрэ чыпIэм зызэрехъокIы, общественнэ чIыпIэ зэфэшъхьафхэм, еджапIэхэм, тучанхэм, автобус къэуцупIэхэм Адыгеим ичIыопс епхыгъэ ­сурэтхэу кIэлэеджакIохэм ашIыгъэхэр атырагъэуцох.
«Росмолодежь. Гранты» зыфиIорэм иIэпыIэгъу ишIуагъэкIэ Карен Каракьян ипроект щыIэныгъэм щыпхырещы.

— НыбжьыкIэхэм проектыр зэрашIогъэшIэгъоныр нафэ къытфэхъугъ. Егъэджэн сыхьатхэм нэIуасэ зыфашIыгъэхэр ары кIэлэцIыкIухэм сурэт ашIыгъэ­хэр. Мышъэ, домбай, леопард, мэзкъатыхъу зыфэпIощт псэушъ­­хьэхэр чIыпIэу зыщыпсэухэ­рэм ятамыгъэх. Ясурэтхэр джы яаль­бомхэм адэтхэ къодыеп, инэу ахэр дэпкъхэм атешIыхьагъэхэу станицэр къагъэкIэрэ­кIэщт.
Творческэ зэнэкъокъум ыуж IофшIэнхэм ауж ихьагъэх — чъэпыогъу мазэм проектым хэлажьэхэрэм шэмбэт шIыхьаф афызэхащэгъагъ, сурэтхэр зытетыщт чэухэр, дэпкъхэр агъэ­къэбзагъэх, агъэхьазырыгъэх.
Проектым анахь гъэшIэгъонэу хэтхэм ащыщ кIэлэцIыкIухэм яэскизхэр арт-объект зэрашIыгъэхэр. Ахэм ащыщ шэкIогъум и 6-м псэупIэм иавтобус къэу­цупIэ тырашIыхьагъэр, джащ фэдэу шэкIогъум и 7-м станицэу Курджипскэм дэт гурыт еджапIэм ичIыпIэ зэфэшъхьаф­хэр агъэдэхагъэх. КIэлэцIыкIу­хэм яIофшIэгъэ анахь дэгъухэр сурэтышIхэм къыхахыгъэх ыкIи хэушъхьафыкIыгъэ шIыкIэмкIэ дэпкъхэм арагъэкIугъэх.
2025-рэ илъэсым псэупIэм игурыт еджапIэкIэ мыр ящэнэрэ социальнэ-культурнэ проектэу щыт. ЫпэкIэ кIэлэеджакIохэр проектэу «Раз, два, три, четыре, пять — в школу я иду опять!» ыкIи «Школьная эко­лого-краеведческая экспедиция «Открывай Адыгею» зыфиIорэм хэлэжьагъэх.