Транспортыр ешъуагъэу зыгъэIорышIэщтыгъэ нэбгыри 4-мэ алъэныкъокIэ уголовнэ Iофхэр къызэIуахыгъэх.

Къэралыгъо автоинспекцием иIофышIэхэр ешъуагъэу автомобилыр зезыфэхэрэм якъыхэгъэщын зэпымыоу ыуж итых, ащ фэгъэхьыгъэ Iофтхьабзэхэр рагъэкIокIых.
Шэуджэн районым щыщ хъулъфыгъэу тихэгъэгу къыщашIыгъэ автомобилыр зыгъэIорышIэщтыгъэр инспекторхэм къагъэуцугъ. Зэрешъуагъэм гу зылъа­тэм, медицинэ уплъэкIуныр рагъэкIунэу зыфагъэ­загъ, ау ар къафеуцолIагъэп.
Джащ фэдэ хъугъэ-шIэгъитIу Мыекъуапи щагъэу­нэфыгъ. Къэлэ урамхэм полицейскэхэм къулыкъур ащахьызэ, илъэс 37-рэ зыныбжь хъулъфыгъэр ыкIи ащ илэгъоу Кощ­хьэ­блэ районым щыщыр къа­гъэуцугъэх. НэбгыритIуми чэф яIэу къычIэкIыгъ, ме­дицинэ уплъэкIуныр афакIугъэп. НэбгыритIури мыщ ыпэкIи а IофымкIэ къаубытыгъэхэу, водительскэ удостоверениехэр аIахыгъэхэу щытыгъ.
Теуцожь районми инспекторхэм ешъуагъэу рулым кIэрысэу зы нэбгы­рэ къыщаубытыгъ. Илъэс 42-рэ зыныбжь хъулъфыгъэр Забайкальскэ краим щыщэу къычIэкIыгъ. Зэре­шъуагъэм къыхэкIэу машинэр зэрифэнымкIэ фитыныгъэр Iахыгъэу щы­тыгъ нахь мышIэми, ащ къы­гъэуцугъэп, джыри ятIо­нэрэу къаубытыгъ.
Мы уахътэм хэбзэу­къоныгъэ зезыхьагъэхэм яавтомобильхэр аIахыгъэх, хэушъхьафыкIыгъэ гъэуцупIэм ащагъэх. Ешъуа­гъэу транспортыр зэрагъэIорышIэщтыгъэм епхыгъэу уголовнэ Iофхэр къафызэIуахыгъэх. ИлъэситIум нэс хьапс ахэм къахьын алъэкIыщт.