Урысые Iофтхьабзэу «Хьадэгъур зыщащэрэр ошIэмэ, макъэ къытэгъэIу!» зыфиIорэр наркотикхэр хэбзэнчъэу къыра­мыгъэ­кIо­кIынхэм фэгъэхьыгъ.

Мазэм къыкIоцI Адыгеим ихэбзэухъумакIохэм мы Iофыгъом епхыгъэу наркотикхэр зыщэхэрэм, ахэр къезыгъэкIокIыхэрэм ыкIи зыгъэфедэхэрэм япхыгъэ къэбархэр къыз­IэкIагъэхьагъэх.
Ащ нэмыкIэу пэшIорыгъэшъ Iофтхьабзэхэм язэ­хэщэн анаIэ тырагъэтыгъ. Непэрэ мафэм ехъулIэу медицинэ IэпыIэгъу зищыкIагъэхэр агъэунэфыгъэх, тхылъ зэфэшъхьафхэр аугъоигъэх ыкIи специалистхэр упчIэжьэгъу къа­фэхъугъэх.
Iофтхьабзэр зыщыкIогъэ уахътэм цIыфхэм гъогогъу 36-рэ полицием зыкъыфагъэзагъ. Оперативнэ ыкIи лъыхъон Iофтхьабзэхэм яшIуагъэкIэ наркотикхэм япхыгъэ бзэджэшIэгъиплI къыхагъэщыгъ, нэбгырэ 15-мэ административнэ пшъэдэкIыжь арагъэхьыгъ. Наркотик грамм 400 къап­къырахыгъ.
Полицием иIофышIэхэр ныбжьыкIэхэм аIукIагъэх. Наркотикхэм щыIэныгъэмкIи псауныгъэмкIи зэрарэу къахьырэр ахэм къафаIотагъ.
Джащ фэдэу ныбжьыкIэ­хэр зыщызэрэугъоихэрэ чIыпIэ 28-рэ ауплъэкIугъ.
АР-м хэгъэгу кIоцI IофхэмкIэ и Министерствэ ипресс-къулыкъу.