Гъэсэныгъэ форумэу «НыбжьыкIэхэр ыкIи кIэлэцIыкIухэр» зыфиIорэр бэмышIэу Мыекъуапэ щызэхащагъ.

Республикэм икъалэхэм ыкIи ирайонхэм къарыкIыгъэ нэбгырэ 600 фэдиз ащ хэлэжьагъ. Апшъэрэ еджапIэхэм ащеджэхэрэм ыкIи гурыт сэнэхьат зэзыгъэгъотырэ студентхэм, кIэлэеджакIохэм яшIэны­гъэхэм ахагъэхъуагъ.
КIэлэцIыкIухэмрэ ныбжьыкIэ­хэмрэ я Урысые общественнэ-­къэралыгъо движениеу «Апэрэхэм ядвижение» ишъолъыр къута­мэ Iофтхьабзэм кIэщакIо фэ­хъугъ. Лъэныкъо зэфэшъхьаф­хэмкIэ ныб­жьыкIэхэм яшIэны­гъэхэм ахагъэхъоныр, купым хэ­тэу Iоф ашIэн алъэкIыныр, нэIуасэ зэфэхъунхэр ары пшъэ­рылъ шъхьаIэу зэхэщакIохэм зы­фагъэуцужьырэр.
МэфэкI шIыкIэм тетэу Iофтхьабзэр къызэIуахыгъ. АР-м гъэсэныгъэмрэ шIэныгъэмрэкIэ иминистрэ игуадзэу Артем Журавель пэублэ псалъэ ащ къыщи­шIыгъ. шIуфэс къарихыгъ.
— Непэ пэрытхэм язэIукI, ныб­жьыкIэгъур лъэхъан дэгъу. Мы лъэхъаным гухэлъышIоу ­шъуиIэхэр щыIэныгъэм щыпхырышъущынхэмкIэ амалышIухэр шъуиIэх. «Апэрэхэм ядвижение» илъэситIу хъугъэ зэрифэшъуашэу иIофшIэн зигъэцакIэрэр, ащ фэдиз уахътэм гъэхъагъэу ашIырэр нэрылъэгъу. ШIэныгъэу жъугъотыгъэхэмкIэ форумыр, апэ­рэмкIэ, изэфэхьысыжь, ятIонэ­рэм­кIэ, лъэныкъуакIэхэм япэубл. Неущырэ мафэр шъоры зэлъытыгъэр, тыкъышъущэгугъы, — къы­Iуагъ Артем Журавель
Нэужым Мыекъопэ къэралыгъо технологическэ университетымрэ Адыгэ къэралыгъо университетымрэ ныбжьыкIэ политикэмкIэ япроректорхэу БрантI Муратрэ ШъхьакIэмыкъо Рустамрэ ныбжьыкIэхэм адэгущыIагъэх.
Форумым хэлэжьагъэхэм программэ гъэшIэгъон зэхэщакIохэм афызэхагъэуцуагъ. МэфитIум предпринимательствэмкIэ яшIэны­гъэхэм ахагъэхъуагъ, джащ фэдэу цифрэм епхыгъэ сэнэхьатхэм, графичесчкэ дизайным, грантхэм, ушэтын зэфэшъхьафхэм нэIуасэ афэхъугъэх, сурэттехынымкIэ, пси­хологиемкIэ, видеотехынымкIэ егъэджэнхэм ахэлэжьагъэх.
КIэухым «Апэрэхэм ядви­жение» ишъолъыр къутамэ ипащэу Ованес Шекерьянц ныб­жьыкIэхэм гущыIэгъу афэхъугъ, анахь къахэщыгъэхэм щытхъу тхылъхэр аритыгъ.