ЯшIэныгъэхэмкIэ заушэтыгъ
КиберщынэгъончъэнымкIэ зэнэкъокъоу «АRCTF 4» зыфиIорэр мы мафэхэм Адыгэ къэралыгъо университетым щыкIуагъ.
Мыгъэ ащ нэбгырэ 70-рэ фэдиз хэлэжьагъ, ахэр куп-купэу гощыгъагъэх. Адыгеим имызакъоу, Урысыем и Къыблэ шъолъыри 4-мэ къарыкIыгъэхэр ахэм ахэтыгъэх.
МэфитIум ныбжьыкIэхэм яшIэныгъэхэмкIэ заушэтыгъ, гъэцэкIэн къинхэр охътэ кIэкIым къашIынхэ фэягъ.
Олимпиадэм фэмыдэу, зэхэтэу гъэцэкIэнхэр зэдашIынхэ, интернетыр къызфагъэфедэн амал яIагъ.
АР-м гъэсэныгъэмрэ шIэныгъэмрэкIэ иминистрэу Евгений Лебедевым къэзэрэугъоигъэхэм зафигъазэзэ, мыщ щагъотырэ шIэныгъэхэр ящыIэныгъэкIэ къызэрафэфедэщтыр къариIуагъ.
Нэужым гущыIэ аратыгъ АР-м информационнэ, телекоммуникационнэ технологиехэмкIэ иминистрэ иапэрэ гуадзэу Михаил Семенцовым, Адыгэ къэралыгъо университетым прикладной хьисапымкIэ, информационнэ технологиехэмкIэ кафедрэм ипащэу Марат Алиевым.
КIэухым анахь дэгъоу зыкъэзыгъэлъэгъуагъэхэр агъэшIуагъэх. Апэрэ чIыпIэр къыдахыгъ купэу «Team8» зыфиIорэм хэтхэ Тимофей Лисиным, Даниил Смагловым, Егор Джун. КIэлэеджакIохэмкIэ апэрэ хъугъэх Владислав Оголевыр, Артем Германовыр, Илья Бердниковыр.
ДЕЛЭКЪО Анет.