Адыгеим и ЛIышъхьэу КъумпIыл Мурат Урысые Федерацием IэкIыб къэрал IофхэмкIэ и Министерствэ и ЛIыкIо иIофшIапIэу Краснодар щыIэм ипащэу Ольга Шалимовам АР-м и Правительствэ зычIэт унэм щыIукIагъ.

Iофтхьабзэм хэлэжьагъэх Адыгеим и ЛIышъхьэрэ иминистрэхэм я Кабинетрэ я Администрацие ипащэу Владимир Свеженец, АР-м и ЛIышъхьэ IэкIыб зэпхыныгъэхэмкIэ ыкIи инвестиционнэ политикэмкIэ иIэпыIэгъоу Хьакъунэ Бэллэ.
Ольга Шалимовам республикэм ипащэ къыфиIотагъ Урысые Федерацием IэкIыб къэрал IофхэмкIэ и Министерствэ и ЛIыкIо иIофшIапIэу Краснодар щыIэм иупчIэжьэгъоу Мыекъуапэ Iоф щишIэнэу Игорь Терзиян зэрагъэнэфагъэм фэгъэ­хьыгъэу. Илъэс 25-м ехъугъэу IэкIыб къэрал IофхэмкIэ Министерствэм ащ Iоф щешIэ, а уахътэм ызыныкъо нахьыбэм Адыгэ Республикэм щылэжьагъ. УФ-м IэкIыб къэрал IофхэмкIэ и Министерствэ илIыкIо ыпэкIэ тиреспубликэ апэрэ секретарэу щылэжагъ.
КъумпIыл Мурат Игорь Терзиян иIоф зэрэфытегъэпсыхьагъэр, шъолъырым хэшIыкIышхо зэрэфыриIэр, республикэм ихэбзэ къулыкъухэм шIуагъэ къытэу адэлэжьэн зэрилъэкIырэр къыхигъэ­щыгъ, гъэхъагъэ хэлъэу тапэкIи зэдэлэжьэныгъэр лъигъэкIотэнэу зэрэщыгугъырэр къыIуагъ.
IэнэтIакIэм Iухьагъэм Урысыем IэкIыб къэрал IофхэмкIэ и Министерствэ игупчэ аппарат дипломатическэ IофышIэм истатус къызэраIэтыгъэм фэшI зэрэфэразэр, дунэе зэдэлэжьэныгъэм ылъэныкъокIэ республикэр кIэщакIо зыфэхъу­рэ Iофтхьабзэхэм адыригъэштэным зэрэфэхьазырыр къыIуагъ.

ЗэIукIэгъум илъэхъан муниципальнэ зэдэлэжьэныгъэмкIэ, культурэмкIэ, гъэ­сэныгъэмкIэ, адыгэхэу IэкIыб къэралыгъохэм ащыпсэухэрэм зэпхыныгъэ адыряIэнымкIэ тапэкIэ Iофэу ашIэщтым, ащкIэ амалэу щыIэхэм лъэныкъохэр атегущыIагъэх. Урысые Федерацием IэкIыб къэрал IофхэмкIэ и Министерствэ и ЛIыкIо иIофшIапIэу Краснодар щыIэм ипащэу Ольга Шалимовам зэрэхигъэунэфыкIыгъэмкIэ, республикэм шIушIэ, экономическэ дунэе Iофтхьабзэу зэрихьэхэрэмкIэ IэпыIэгъу къаритыным Министерствэр фэхьазыр.
Адыгеим и ЛIышъхьэ къызэрэхигъэщыгъэмкIэ, Урысыем IэкIыб къэрал IофхэмкIэ и Министерствэ IэпыIэгъу къафэхъузэ, мэхьанэшхо зиIэ проект заулэ пхыращын, IэкIыб къэралхэм ащыпсэурэ бизнесменхэм зэпхыныгъэ пытэхэр адашIын алъэкIыгъ. ТапэкIи ащ тетэу Iофхэр лъагъэкIотэнхэу рахъухьэ.