Адыгэ Республикэм и ЛIыкIо IофшIапIэу Урысыем и Президент дэжь щыIэм общественнэ организациеу «Врачхэм я Хасэ» зыфиIорэм илъэс къэс зэхищэрэ зэIукIэр щыкIуагъ.

«Хасэр зызэхащагъэр илъэсищ нахьыбэ мыхъугъэ­ми, а охътэ кIэкIым къыкIоцI зэрящыкIагъэр, ипшъэ­рылъхэр зэригъэцакIэхэрэр къыгъэлъэгъуагъ, зэрэхэгъэгоу мэхьэнэ гъэнэфагъэ зиIэ социальнэ институтэу щыхъугъ. Непэ Жанна Семеновам пэщэныгъэ зыдызэрихьэрэ Хасэм хэхьэх шIэныгъэхэмкIэ докторхэр, профессорхэр, научнэ-ушэтэкIо гупчэхэу ыкIи учреждениехэу псауныгъэм икъэухъумэн фэгъэзагъэхэу Мыекъуапэ, Налщык, Черкесскэ, хэгъэгум медицинэм анахь гъэхъэгъэ­шхо зыщишIыгъэ икъалэхэу Москва, Санкт-Петербург, Волгоград, Краснодар, IэкIыб хэгъэгу зэфэшъхьафхэм яшъолъырхэм ялIыкIохэр», — къаригъэхьагъ Адыгеим и ЛIышъхьэ социальнэ хъытыухэм янэкIубгъохэм.
«Врачхэм я Хасэ» ишIуагъэкIэ научнэ, гъэсэныгъэ, шIушIэным епхыгъэ Iофтхьэбзабэ зэхэщагъэ хъугъэ. Медицинэм ылъэныкъокIэ пэрытныгъэ зыIыгъ экспертхэм ыпкIэ хэмылъэу цIыфхэр зыгъэгумэкIырэ Iофыгъо­хэр къафызэхафых, онлайн-курсхэр зэхащэх, лекциехэм къяджэх, студентхэмрэ врач ныбжьыкIэхэмрэ IэпыIэгъу афэхъух, IэзэнымкIэ джырэ шIыкIэ-амалэу щыIэхэм ягъэфедэнкIэ IофшIэкIэшIоу аIэкIэлъымкIэ адэгуащэх.
«Врачхэм я Хасэ» хэтхэм зэфэхьысыжь зэIукIэу яIагъэм хэлэжьагъэх Урысые Федерацием исенаторхэр, Адыгеим, Къэбэртэе-Бэлъкъарым, Къэрэщэе-Черкесым яофициальнэ лIыкIохэу Урысыем и Президент дэжь щыIэхэр. Ахэр 2025-рэ илъэсэу икIырэм икIэуххэм къатегущыIагъэх, къихьащт илъэ­сымкIэ пшъэрылъхэр агъэнэфагъэх.
«Организацием игупчэ итхэм зэшIуахырэ пстэуми мэхьанэшхо яI, псауныгъэм икъэухъумэн хэхъоныгъэ ышIыным, медицинэм иIофышIэ хъущтхэм ухьазырыныгъэ дэгъу ягъэгъотыгъэным, шъолъырхэм язэдэ­лэжьэныгъэ гъэпытэгъэным, цIыф къызэрыкIохэм япсауныгъэ къэухъумэгъэным ыкIи гъэпытэгъэным афэлажьэх. Организациер зызэхащагъэм къыщыублагъэу ар кIэщакIо зыфэхъурэ Iофтхьабзэхэм тиреспубликэ адырегъаштэ. ТапэкIи шIуагъэ къытэу тизэдэлэжьэныгъэ зэрэлъыкIотэщтым тицыхьэ телъ», — къыхигъэщыгъ КъумпIыл Мурат.