Гъэсэныгъэ гупчэу «Сириус» зыфиIорэм мы мафэхэм я XI-рэ ШышъхьэIу гъэсэныгъэ хьисап программэ щызэхащагъ. Адыгеим икIыгъэ кIэлэеджакIохэм зэрифэшъуашэу ащ зыкъыщагъэлъэгъуагъ. Олимпиадэхэр, хьисапымкIэ ыкIи естественнэ шIэныгъэхэмкIэ лекциехэр, гъэсэныгъэ егъэджэн сыхьатхэр афызэхащагъэх, джащ фэдэу культурнэ Iофтхьабзэхэр программэм къыдыхэлъытэгъагъэх.

ЗэкIэмкIи я 7 — 10-рэ классхэм ащеджэрэ кIэлэеджэкIо 213-рэ ащ хэлэжьагъ. Урысыем ишъолъыр 17-мэ, Абхъазым ыкIи Узбекистан ахэр къарыкIыгъэх.
Адыгеим икIыгъэ кIэлэеджакIохэр анахь къэгъэлъэгъон дэгъу зиIэхэм ащыщых. Республикэ естественнэ хьисап еджапIэм щеджэхэрэ Мэрэтыкъо Дамиррэ Арсений Степаненкэмрэ апэрэ шъуа­шэ зиIэ дипломхэр къафагъэшъошагъэх. Я 8-рэ классым щеджэрэ Саният Мирзаалиевам я II-рэ шъуашэ зиIэ диплом къылэжьыгъ, я 7-рэ классым щеджэрэ Максим Кузьменкэм, я 8-рэ классым икIэлэеджакIоу Сержик Адамян, я 9-рэ классым ис Мамый Ярэ, я 10-рэ классым щеджэрэ Роман Кузнецовым, я 8-рэ классым икIэлэеджакIоу Софья Кисляковам я III-рэ шъуашэ зиIэ дипломхэр къафагъэшъошагъэх.
Программэм ипащэр Адыгэ къэралыгъо университетым иректорэу Мамый Даут. Iофтхьабзэм хэлэжьагъэхэм яамалхэр къызэрагъэлъэгъуагъэхэм дакIоу, хьисап шIэныгъэмкIэ гъэхъагъэхэр зиIэ Андрей Райгородскэм, Алексей Саватеевым, Николай Андреевым гущыIэгъу афэхъугъэх. Хабзэ зэрэхъугъэу, Сергей Дориченкэм гитарэм ипчыхьэ ыкIи Олег Дмитриевым поэтическэ пчыхьэ зэхащагъ.
КIэлэеджакIохэм аныбжь ыкIи шIэныгъэу аIэкIэлъхэм ялъытыгъэу куп 11-у гощыгъэхэу Iоф ашIагъ. Задачэ 2000 фэдиз ахэм къашIыгъ, хьисап джэгукIэхэр афызэхащагъэх.