Щэбзэ щэрыонымкIэ зэнэкъокъоу «Урысыем игугъапIэхэр» зыфиIорэр къалэу Великие Луки щыкIуагъ. Ащ зыщызыушэтыгъэ Мыекъуапэ илIыкIоу Иван Лемешевым спортым имастер хъунымкIэ шапхъэр ригъэкъугъ.

Илъэс 17 зыныбжь тиспортсмен зэнэкъокъум иапэрэ мафэ зэрифэшъуашэу зыкъыщигъэлъэгъуагъ. Ар гъогогъу 60-рэ щэрыуагъ ыкIи очко 579-рэ ригъэкъугъ. Ар зэкIэми анахь къэгъэлъэгъон дэгъу хъугъэ. Мыекъопэ спорт еджапIэу В.С. Максимовым зыщызыгъэсэрэ Иван Лемешевым ыуж къинагъэх спортымкIэ дунэе класс зиIэ мастерхэу Роман Дудникрэ Владимир Дубасовымрэ (Иркутскэ хэкур). Ау кIэух едзыгъом тикIалэ бэ къыщыдэхъугъэп, Москва илIыкIоу Лев Зубаревыр 2:6-у къытекIуи, зэнэкъокъум къыхэзыгъ.
Спортсмен анахь лъэш 32-мэ ахэфагъ республикэм икъэлэ шъхьа­Iэ къэзыгъэлъэгъогъэ Алиса Кожевниковар. Ащ очко 561-рэ ригъэ­къугъ ыкIи я 15-рэ чIыпIэр къыдихыгъ. Спортым имастер хъунымкIэ очкоуи 8 ныIэп зыщыкIагъэр. Москва испортсменкэу Елизавета Тен къытекIуагъэр. Команднэ зэнэкъокъум республикэм илIыкIохэм я 12-рэ чIыпIэр къыщыдахыгъ. Адыгеир къэзыгъэлъэгъуагъэхэр: Алиса Кожевниковар, Мыгу Амина ыкIи Анастасия Муровар.