ДзюдомкIэ дунэе команднэ турнирэу «Битва городов» зыфиIорэм Адыгеим испортсменхэм хагъэунэфыкIырэ чIыпIэ къыщыдахыгъ. Зыныбжь илъэс 18-м емыхъугъэхэр ары зызыушэтыгъэхэр.

Проектым икIэщакIох Урысыем дзюдомкIэ и Федерацие, шIушIэ фондэу «Колыбель Отечества» ыкIи программэу «ДоброFON» зыфиIохэрэр. Iофтхьабзэм хэлажьэхэрэр къэли 6-мэ ащызэнэкъокъугъэх. Ростов-на-Дону щыкIогъэ турнирым Къыблэ федеральнэ шъолъырыр къэзыгъэлъэгъорэ команди 8 хэлэжьагъ. Бысымхэр командищ хъущтыгъэх, Адыгеим, Къалмыкъым, Краснодар краим, Астраханскэ ыкIи Волгоградскэ хэкухэм зырыз.
Зы командэм текIоныгъэ 13 къыдехыфэкIэ е пчъагъэр 8:0 охъуфэкIэ зэнэкъокъунхэ фэя­гъэх. Командэхэр купитIоу гощыгъа­гъэх. Адыгеим идзюдоистхэр Волгоградскэ хэкум — 13:12-у, Астраханскэ хэкум — 13:6-у ыкIи «Отечество Дон» зыфиIорэм — 13:5-у атекIуа­гъэх. Ау финалныкъом командэу «Придонье Топ Тим» зыцIэр нахь щылъэшыгъ, пчъагъэр — 10:13. Республикэм илIыкIохэм ящэнэрэ чIыпIэр къафагъэшъошагъ, ау Суперфиналым ихьанхэ алъэкIыгъэп. Краснодар краим илIыкIохэм пэрытныгъэр аубытыгъ, ахэр кIэух едзыгъом «Придонье Топ Тим» зыфиIорэм испортсменхэм 8:0-у атекIуагъэх.
Урысыем икъэли 6-мэ ащыкIогъэ зэнэкъокъухэм язэфэхьысыжьхэмкIэ Суперфиналым командэ 32-рэ ихьагъ. Ахэм ты­гъэгъазэм и 6-м щегъэжьагъэу и 13-м нэс федеральнэ чIыпIэу «Сириусым» (Шъачэ) зыщаушэтыщт.