Адыгеир къэзыгъэлъэгъорэ командэу «Урожаир» (псэупIэу Тульскэр) футболымкIэ Къыблэ ыкIи Темыр-Кавказ федеральнэ шъолъырхэм ячемпионхэм ялигэ ифинал ихьан ылъэкIыгъэп.

Финалныкъом къыдыхэлъытагъэу республикэм икомандэ «Кубань Холдинг-2» зыфиIорэм дешIагъ ыкIи 1:3-у зэIукIэгъур шIуахьыгъ. «Урожаим» хэт Эдуард Геращенкэм пчъагъэр къызэIуихыгъ, ау ащ ыуж псэупIэу Павловскэм илIыкIохэм къэлапчъэм Iэгоуищ къыда­дзагъ ыкIи Гъомлэшк Мурат ыгъэсэрэ футболистхэм текIоныгъэр къыдахыгъ.
Мы командитIум Мыекъопэ «Зэкъошныгъэм» щешIагъэхэр ахэтых. Турнирым икIэух едзыгъо шэкIогъум и 30-м Черкесскэ истадионэу «Нартым» щыкIощт. Мыщ щызэIукIэщтых «Кубань Холдинг-2-мрэ» Ингушетиер къэзыгъэлъэгъорэ «Реал-Сунжей» зыфиIорэмрэ.