Сэнэхьат ухьазырыныгъэмкIэ шъолъыр программэу «Адыгеим и ЛIыхъужъхэр» зыфиIорэм иапэрэ еджэгъу едзыгъо аухыгъ, джы ащ хэлэжьэрэ ветеранхэр къыхахыгъэ сэнэхьатым елъытыгъэу IофшIапIэхэм ащыIэхэу яIэпэIэсэныгъэ хагъахъо.

Программэм хэлажьэхэрэм ащыщ хэушъхьафыкIыгъэ дзэ операцием иветеранэу Александр Махневыр. Ащ АР-м лъэпкъ IофхэмкIэ, IэкIыб къэралхэм ащыпсэурэ зэлъэпкъэгъухэм адыряIэ зэпхыныгъэ­хэмкIэ ыкIи къэбар жъугъэм иамалхэмкIэ и Комитет итхьаматэу Долэ Долэт игъэсэкIо шъхьаIэу иIэпэIэсэныгъэ хе­гъахъо.
Мы уахътэм анахь шъхьаIэу анаIэ зытырагъэтырэр гъэцэ­кIэкIо хабзэм икъулыкъухэм яIофшIэн ыкIи япшъэрылъхэр зэрагъэшIэнхэр ары. ЛIы­хъужъхэм ясэнэхьат IэпэIэсэныгъэ хагъэхъоным фэшI гъэсакIохэр яшIэныгъэхэмкIэ къа­дэгуащэх.
Александр Махневыр зэо зэ­фэшъхьафхэм яветеран, хэу­шъхьафыкIыгъэ подразделениеу «Альфа» зыфиIорэм иофицерэу пенсием тIысыжьыгъ.
— 2022-рэ илъэсым хэушъхьа­фыкIыгъэ дзэ операциер къызежьэм, бэрэ семыгупшысэу дзэ IэпэIэсэныгъэу сIэкIэлъымкIэ сишIуагъэ къыщыкIонэу слъыти, ащ сыхэлэжьэнэу зэзэгъыныгъэм сыкIэтхагъ. Пулеметчикэу щезгъажьи, ротэм икомандирэу сыухыгъ. УIэгъэ хьылъэ къыстещагъэ хъуи сыкъэкIожьыгъ, джы реабилита­цием сыщыI. СисэнэхьаткIи, си­шIэныгъэхэмкIи республикэм сишIуагъэ къыщыкIонэу слъыти, программэу «Адыгеим и ЛIыхъужъхэр» зыфиIорэм сыхэ­лэжьагъ. Тиеджэн иапэрэ едзы­гъо зытэухым, лъэпкъ IофхэмкIэ, IэкIыб къэралхэм ащыпсэурэ зэлъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ Комитетым сиIэпэIэсэныгъэ щыхэзгъэ­хъонэу сагъэкIуагъ. Долэ Долэт ынаIэ къыстетэу IофшIэным сыфегъасэ. Республикэм щыкIогъэ игъэкIотыгъэ Iофтхьабзэхэм, ассамблеехэм сахэлэжьагъ, — къыIуагъ Александр Махневым.
Iэшъынэ Сусан.