Урысые проектэу «Апэрэ студенческэр» зыфиIорэмкIэ зэнэкъокъум Адыгэ къэралыгъо университетым и МГГТК икомандэ хэлэжьагъ ыкIи анахь дэгъухэм ахэфагъ, я 9-рэ чIыпIэм уцугъэ.

КIэух зэнэкъокъур шэкIогъум и 17-м къыщыублагъэу и 19-м нэс къалэу Москва щыкIуагъ, шъолъыр 89-мэ къарыкIыгъэ нэбгырэ 500-м ехъу щызэIукIагъ. ЗэкIэмкIи 2025-рэ илъэсым проектым студент мин 25-рэ хэлэжьагъ.
Адыгеим истудентмэ гъэсэныгъэ проектэу «Еджэрэ колледж» зыфиIорэр къагъэлъэ­гъуагъ, ямышIыкIэ екIолIакIэу фашIыгъэр осэшIмэ лъэшэу агу рихьыгъ. Апшъэрэ пшъэрылъыр — непэрэ шапхъэхэр агъэфе­дэхэзэ псэ зыпыт еджэрэ сообществэр гъэпсыгъэныр ары. Ащ пае нэкIубгъо 19 зыфа­шIыгъэ Telegram-каналыр къыхахыгъ: литературнэ мемхэм (#Мемасикхэм) къащыублагъэу студентмэ яIофшIагъэмэ къа­хэхыгъэ псэлъэ щэрыомэ (#Окрыленныемузой) ыкIи зэлъашIэрэ цIыфхэм яушъыйхэр ягъусэхэу (#Звездасоветует).
«ТэркIэ текIоныгъэр — гушIогъошху ыкIи тызэралъытэрэм итамыгъ. Тэ каналыр дгъэпсыгъэ къодыеп, еджэрэ сообщест­вэ шъыпкъэ щызэхэтщагъ, ащ нэбгырэ пэпчъ ежь зыфаер щигъотын ылъэкIыщт. Тхылъыр зыкIи къызэгозымыхыгъэ нэбгырабэми ар ашIогъэшIэгъонынэу тшIыгъэ, джащ фэдэу студентхэр, ны-тыхэр ыкIи кIэлэегъаджэхэр литературэмкIэ зэтпхыгъэх. Нэкъокъорэ минхэм къахахи, тэ типроект уасэ къызэрэфашIыгъэм къегъэлъагъо: гъогу зафэм тытет. Тинепэрэ пшъэрылъыкIэр — шъо­лъырхэм азыфагукIэ щыIэщт Iофтхьабзэм хэлэжьэгъэныр ары», — къыхигъэщыгъ проектым ипащэу, кIэлэегъаджэу Наталья Фоминам.
«Апэрэ студенческэр» фе­деральнэ проектэу «Тэ тызэ­гъус» зыцIэм ыкIи лъэпкъ про­ектэу «НыбжьыкIэхэр ыкIи ­кIэлэцIыкIухэр» зыфиIорэм къахиубытэу агъэцакIэ.