Мыекъопэ къэлэ хьыкумым Урысые Федерацием щыщэу илъэс 53-рэ зыныбжь А. Г. Крицковыр хэбзэнчъэу Адыгэ Республикэм щызэхащэгъэ уIэшыгъэ формированием иIофшIэн хэлэжьагъэкIэ ыгъэмысагъ. Хьыкумым иунашъо хэбзэ кIуачIэ иIэ хъугъэ.

ЩынэгъончъэнымкIэ Федеральнэ къулыкъум Адыгэ РеспубликэмкIэ и ГъэIорышIапIэ иIофышIэхэм зэрагъэунэфыгъэмкIэ, уIэшыгъэ формированиер хэбзэнчъэу Адыгеим зыкIыщызэхащэгъагъэр Урысые Федерацием иконституционнэ гъэпсыкIэ егъэзыгъэкIэ зэблахъунэу ары. Ежь ишIоигъоныгъэкIэ А. Г. Крицковыр зигугъу къэтшIыгъэ уIэшыгъэ купым хэхьагъ. НэмыкIхэр ащ хэщэгъэнхэм, Iашэхэмрэ щэ-гынхэмрэ якъэгъотын ауж итыгъ.
Урысыем щынэгъончъэнымкIэ и Федеральнэ ­къулыкъу Адыгэ РеспубликэмкIэ и ГъэIорышIапIэ иматериалхэр яIэубытыпIэхэу Урысыем и Уголовнэ кодекс ия 208-рэ статья ия 2-рэ Iахь, ия 222-рэ статья иа 1-рэ Iахь зигугъу къашIырэ бзэджэшIагъэхэр зезыхьэгъэ А. Г. Крицковым уголовнэ Iофэу къыфызэIуахыгъэхэм ахэплъагъэх.
Мыекъопэ къэлэ хьыкумым илъэси 8-рэ мэзи 6-рэ хьапс ащ тырилъхьагъ.
Адыгэ Республикэм и Апшъэрэ хьыкум апелляционнэ тхьаусыхэ тхылъым зыхаплъэм, Мыекъопэ къэлэ хьыкумым иунашъо дыригъэштагъ.