АР-м тыкъэзыуцухьэрэ дунаимрэ чIыопс къэкIуапIэхэмрэ якъэу­хъумэн­кIэ и ГъэIорышIапIэ уплъэкIунхэмкIэ испециалист шъхьаIэу ХьэдэгъэлIэ Алый къыфызэIуахыгъэ уголовнэ IофымкIэ Тэхъутэмыкъое район хьыкумым кIэух зэфэхьысыжьхэр ышIыгъэх.

Урысыем и Уголовнэ кодекс ия 159-рэ статья ия 3-рэ, ия 4-рэ Iахьхэм зигугъу къашIырэ бзэджэшIагъэхэр зэрихьагъэкIэ ар агъэмысагъ.
Урысыем щынэгъончъэнымкIэ и Федеральнэ ­къулыкъу Адыгэ РеспубликэмкIэ и ГъэIорышIапIэ иIофышIэхэм зэрагъэунэфыгъэмкIэ, А. ХьэдэгъалIэм 2021 — 2025-рэ илъэсхэм сомэ 1695500-рэ хъурэ къуалъхьэхэр пшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «Экологика» ипащэрэ унэе предпринимательхэмрэ къаIихыгъэх. Ащ къыхэкIэу ахэм уплъэкIунхэр афызэхащэщтыгъэп, хэкIхэр зэ­рэзэращэрэ ямашинэхэр коммунальнэ пыдзэфэ пы­тэхэр зыщыратэкъурэ полигонэу Адыгэкъалэ дэтым пэрыохъунчъэу екIуалIэщтыгъэх.
Уголовнэ Iофыр къызэIузыхыгъэр ыкIи зэхэзыфыгъэр Урысыем и Следственнэ комитет Адыгэ Рес­публикэмкIэ иследственнэ гъэIорышIапI ары.
Тэхъутэмыкъое район хьыкумым А. ХьэдэгъалIэм илъэси 2-рэ мэзи 6-рэ условнэу тырилъхьагъ. Хьыкумым иунашъо хэбзэ кIуачIэ иIэ хъугъэ.
ЩынэгъончъэнымкIэ Федеральнэ къулыкъум
АР-мкIэ и ГъэIорышIапIэ ипресс-къулыкъу.