УищыIэныгъэ гъэшIэгъоныщтмэ, ныбжьыр пэрыохъоп. Зыныбжь хэкIотэгъэ бзылъфыгъэхэм апае спорт-зэщтегъэу Iофтхьабзэу «А ну-ка, бабушки!» зыфиIоу Мыекъуапэ щыкIуагъэм хэлэжьагъэхэр ащ ищысэх.

Илъэс 55-рэ ыкIи нахьыбэ зыныбжь бзылъфыгъэхэу республикэм ирайонхэм ыкIи икъалэхэм къарыкIыгъэхэр ащ къыугъоигъэх. Куп пэпчъ цIэ иIагъ, ахэм творческэ къэгъэлъэгъон, тэбэрыжъэхэр, щай IэшIу къагъэхьазырын фэягъ. ГущыIэм пае, Адыгэкъалэ къикIыгъэ купым «Гу дышъэхэр» ыцIагъ. Нэбгырибл хэтыгъэр. Анахьыжъым, Надежда Кузахметовам, илъэс 78-рэ ыныбжь. Ау итеплъэкIэ 60-м нахьыбэ ептыщтэп. Чаны, чэфы, нэутх. Iофтхьабзэу зыхэлажьэрэм гухахъо зэрэхигъуатэрэр ынэу къилыдыкIыхэрэм къахэщыщтыгъ.
— СшIогъэшIэгъон дэд. Мыщ фэдэу тызэхащэу, тагъэчэфымэ, тизэрэщыт нахьышIу мэхъу. ЯтIонэрэ ныбжьыкIэгъу згъотыгъэм фэд. ТызэдэгущыIэ. нэIуасэ тызэфэхъу. УишIыхьагъэу унэм уисымэ дэгъуна! ЦIыф хэхьэ-хэкIым бэ птыригъэурэр. Мыщ тызэрэхэлажьэрэр апэрэ ыкIи лъэшэу тыгу рехьы, — къысфиIотагъ Надежда Кузахметовам.
Пэнэшъу Фатими Адыгэкъалэ къи­кIыгъ. Илъэс 60-м къехъугъ. ИнэIуасэхэм яхьатыркIэ купым къыхэхьагъ. Ежь ипшъэшъэгъухэри къыздыхищагъэх.
— Шъыпкъэр пIощтмэ, тхъагъо мыщ фэдэу узэхэхьаныр. ТэгущыIэ, тэщхы, орэдхэр къэтэIо, тыкъэшъо. ТыныбжьыкIэжьэп, ау унэм тисынэу тыжъэп, — аIо Фатими, игъусэхэми.
ПстэумкIи куп 11-р, ахэр нэбгырэ 200-м нахьыбэ хъущтыгъэх, республикэ стадионым щызэIукIагъ. Ахэм къагъэхьазырыгъэхэр сыхьатрэ ныкъорэм къагъэ­лъэгъуагъэх. Ащ фэшъхьафэу зэнэкъо­къухэр, джэгукIэхэр, къашъохэр афызэхащагъэх.
— Iофтхьабзэу зэхэтщагъэм ипшъэ­рылъыр чанэу, гъэшIэгъонэу упсэун зэрэплъэкIыщтыр зыныбжь хэкIотагъэхэм ядгъэлъэгъуныр ары. Республикэм ичIыпIэ зэфэшъхьафхэм ащ фэдэу ащыпсэухэрэр зэфэтщэнхэр, нэIуасэ зэфэтшIынхэр, шIэныгъэхэмкIэ зэхъожьынхэр ары, — къыхигъэщыгъ социальнэ проектым ипащэу Марина Мельник.

Зыныбжь хэкIотагъэхэм ямэфэкI ихъугъэ-шIэгъэ шъхьаIэхэм ащыщ ащ къыдыхэлъытэгъэгъэ акциеу «Фэбагъэр — дзэкIолIым» зыфиIорэр. Iофтхьабзэм хэлэжьэгъэ бзылъфыгъэ пэпчъ цылъэпэдхэр ыхъыгъэх. ШIуфэкIо купэу «Сетевой плацдарм-01» зыфиIорэм ишIуагъэкIэ хэушъхьафыкIыгъэ дзэ операцием хэлэжьэрэ дзэкIолIхэу Херсон, Запорожскэ, Курскэ ыкIи Белгородскэ лъэныкъохэм ащыIэхэм ахэр афаща­гъэх.
«А ну-ка, бабушки!» зыфиIорэ спорт- зэщтегъэу Iофтхьабзэм ыкIэм куп анахь дэгъур къыхахын фэягъ, ау осэшI купым зэкIэми зэфэдэу лъэшэу зыкъагъэхьазырыгъэу ылъытагъ ыкIи шIухьафтынхэмрэ щытхъу тхылъхэмрэ лъэныкъо зэфэшъхьафхэмкIэ афигъэшъошагъэх.

— Нэбгырэ 200 фэдиз хэлэжьэнэу итхъухьэщтыгъэ, ау къекIолIагъэр ащ нахьыб. Тибзылъфыгъэхэм дэгъоу зыкъагъэлъэгъуагъ. Iофэу тшIэрэр зэрящыкIагъэр джыри зэ ащ къытфиушыхьатыгъ. ТапэкIи тиIофшIэн лъыдгъэкIотэщт. Къэблагъэрэр мы мазэм и 30-м респуб­ликэ стадионым щырекIокIыщт. Скандинавскэ зекIоным ар фэгъэхьыгъэщт. Нэбгырэ 80 хэлэжьэщт, ахэм ащыщэу 55-р зыныбжь хэкIотагъэх, адрэхэр зипсауныгъэкIэ щыкIагъэ зиIэ сабыйхэм янэх. Джащ фэдэу ИлъэсыкIэм ипэгъо­кIэу Лениным ыцIэ зыхьырэ гупчэми мэфэкI Iофтхьабзэ щызэхэтщэт, — къы­Iуагъ Марина Мельник.
Мысатыу зэхахьэу «Физическэ культурэмрэ спортымрэ хахъо ягъэшIыгъэнымкIэ Гупчэр» Iофтхьабзэм икIэщакIу. «НасыпышIуагъэм ыныбжь» зыцIэ социальнэ проектэу Гупчэм ыгъэлажьэрэм ар къыдыхэлъытагъ. Ащ игъэцэкIэнкIэ республикэ бюджетым игрантэу мыгъэ къыдихыгъэр ыгъэфедагъ.
Анцокъо Ирин.