ГъэцэкIэжьын IофшIэнхэр макIох
Адыгеим и ЛIышъхьэу КъумпIыл Мурат Мыекъуапэ икъэлэ парк дэт зыгъэпскIыпIэм игъэкIэжьын зэрэкIорэм фэгъэхьыгъэу къыIотагъ.
«Мыекъуапэ икъэлэ парк — цIыфхэм языгъэпсэфыпIэ чIыпIэ шъхьаIэхэм зэу ащыщыр зыпкъ игъэуцожьыгъэнымкIэ IофшIэнхэр зэрэкIорэм шъущызгъэгъуазэ сшIоигъу. ЗыгъэпскIыпIэм Iоф ышIэу ригъэжьэжьыщтмэ, ыпкIэ лъамытэу ащ зыщагъэпскIын алъэкIыщтмэ къэлэдэсхэр къыкIэупчIэх. А Iофыгъо пстэуми сшъхьэкIэ гъунэ алъысэфы. ЗыгъэпскIыпIэмрэ ащ къыпэIулъ чIыпIэмрэ зэрэщытэу гъэкIэжьыгъэнхэм цIыкIу-цIыкIоу тыкъыфэкIо. Бассейным пшъэрылъ шъхьаIэу иIагъэр къэнэжьыщт. Ащ игъэкIэжьынкIэ проектыр СБЕР-м тыригъусэу къыхэтхыгъ. УФ-м и Правительствэ иIэпыIэгъу ишIуагъэкIэ мыгъэ мэхьанэшхо зиIэ мы проектым игъэцэкIэн тыфежьэн тлъэкIыгъ», — къаригъэхьагъ КъумпIыл Мурат социальнэ хъытыухэм.
Республикэм и ЛIышъхьэ къызэриIуагъэмкIэ, апэрэ чэзыумкIэ федеральнэ ахъщэу къаратыгъэр зэкIэ къызфагъэфедагъ. ЗыгъэпскIыпIэм бетонэу тегъэчъыхьэгъагъэр тырахыжьыгъ, ычIэгъкIи ыбгъухэмкIи пкъэу 600-кIэ ар агъэпытагъ.
ЧIыпIэм изэтегъэпсыхьанкIэ ищыкIэгъэ инженер коммуникациехэр агъэпсыгъэх. Джыдэдэм ятIонэрэ чэзыум ипроект къэралыгъо экспертизэ ашIы.
«ПсэолъэшIын-зыпкъигъэуцожьын IофшIэн шъхьаIэхэм тафежьэным пае мылъку къэкIуапIэхэр тэгъэнафэх. Мы проектыр заухыщтым Мыекъуапэ дэсхэр зэрежэхэрэр сэшIэ. Джырэ шапхъэхэм адиштэрэ рекреацие дгъэпсынышъ, икъоу ар пхырыщыгъэным амалэу тиIэр зэкIэ етхьылIэщт. ЫпэкIэ зэрэщытыгъэм фэдэу ыпкIэ хэмылъэу ащ зызэрэщагъэпскIыщтыр хэсэгъэунэфыкIы. Тэ гухэлъэу тиIэр илъэсыбэрэ цIыфкIуапIэу щытыгъэ, Мыекъуапэ дэсхэми ихьакIэхэми якIэсэгъэ чIыпIэр къалэм едгъэгъотыжьыныр ары. Ащ дакIоу рекреационнэ шъолъырыкIэм изы Iахьэу зыгъэпскIыпIэр хъущт, къэлэ паркыр, «Мэздахэ», псыхъоу Шъхьэгуащэ иIушъо ащ зэрипхыщтых», — къаригъэхьагъ социальнэ хъытыухэм КъумпIыл Мурат.