Теннис цIыкIумкIэ Адыгэ Республикэм ипервенствэ Адыгэкъалэ щыкIуагъ. Зыныбжь илъэс 20-м емыхъугъэхэм язэнэкъокъу зыщаушэтыгъ Мыекъуапэ, Адыгэкъалэ, Тэхъутэмыкъое ыкIи Теуцожь районхэм яспортсменхэм. Iофтхьабзэм кIэщакIо фэхъугъэх АР-м теннис цIыкIумкIэ ифедерациерэ Адыгеим физическэ культурэмкIэ ыкIи спортымкIэ и Комитетрэ.

КIалэхэм ыкIи пшъашъэхэм ухьазырыныгъэ дэгъу къагъэлъэгъуагъ. ТекIоныгъэр ыкIи хагъэу­нэфыкIырэ чIыпIэхэр къыдэзыхыгъэхэр едзыгъуитIукIэ къэнэфагъэх. Апэрэм спортсменхэр купи 4-у гощыгъагъэх, анахь дэгъоу зыкъэзыгъэлъэгъогъэ нэбгырэ тIурытIу текIоныгъэм фэбэнагъэх. А пшъэрылъыр анахь дэгъоу зыгъэцэкIагъэхэр къалэу Мыекъуапэрэ Тэхъутэмыкъое районымрэ ялIыкIохэр ары.

Республикэм икъэлэ шъхьаIэ испортсменкэу Гъыдзэ Самирэ пэрытныгъэр ыубытыгъ, София Рычковамрэ Арина Петровскаямрэ ятIонэрэ ыкIи ящэнэрэ чIыпIэхэр афагъэшъошагъэх. Мы пшъашъэхэм Мыекъопэ спорт еджапIэу С.М. Джэнчатэм ыцIэ зыхьырэм зыщагъасэ.
КIалэхэм язэнэкъокъу пштэмэ, ыпшъэкIэ зигугъу къэтшIыгъэ спорт еджапIэм илIыкIоу Артем Вариводиным текIоныгъэр къыдихыгъ. Тэхъутэмыкъое районым итеннисистхэу Валерий Зиньтяевымрэ Максим Серафимовичрэ хагъэунэфыкIырэ чIыпIэхэр къахьыгъэх.
Хабзэ зэрэхъугъэу, хагъэунэфыкIырэ чIыпIэхэр къыдэзыхыгъэ­хэм тынхэр, текIоныгъэр зыфагъэшъошагъэхэм чемпионхэм якубокхэр аратыгъэх.
Теннис цIыкIумкIэ Адыгеим ичемпионат тыгъэгъазэм ыкIэм Мыекъуапэ щырагъэкIокIыщт.