ГандболымкIэ Къыблэ федеральнэ шъолъырым ипервенствэ Мыекъуапэ ипшъашъэхэм зэрифэшъуашэу зыкъыщагъэлъэгъуагъ, джэрз медальхэр къахьыгъэх.

Урысыем ипервенствэ хэлэ­жьэщт командэхэм якъыхэхынкIэ мыр зичэзыу едзыгъоу щытыгъ, 2011-рэ илъэсым къэхъугъэхэр ары зызыушэтыхэрэр. Мы илъэсым текIоныгъэм командэ 17 фэбанэ. Ахэм ащыщэу 8-м Урысыем и Къыблэ къагъэлъэгъощт. КIэух едзыгъом хэлэжьэщт командэхэр непэ Краснодар щызэIукIэщтых.

Мыекъуапэ икомандэ Волгоград щешIагъ. Спорт еджапIэу С.М. Джэнчатэм ыцIэ зыхьырэм зыщызыгъэсэрэ пшъашъэхэм зэIукIэгъуищ яIагъ. Апэрэм Краснодар краир 22:28-у къащытекIуагъ. Ау ащ ыуж Ростов хэкум — 34:25-у ыкIи Волгоград хэкум — 19:18-у къашIуахьыгъ. Зэфэхьысыжьхэм къызэрагъэлъэгъуагъэмкIэ, командищмэ очко пчъагъэу рагъэ­къугъэр зэфэдиз, ау къэгъэлъэгъон тедзэхэмкIэ Адыгеим игандболисткэхэм ящэнэрэ чIыпIэр аубытыгъ. ЯтIонэрэр Волгоград илIыкIохэм къыдахыгъ, Краснодар краим пэрытныгъэр ыубытыгъ.