ШэкIогъум и 20-м «Мыекъопэ къэралыгъо технологическэ университетым мэкъумэщ технологическэ классхэм язичэзыу егъэджэн уахътэ щырагъажьэ» зыфиIорэ Iоф­тхьабзэр щыкIуагъ.

ЗэкIэмкIи мыгъэ Адыгеим ащ фэдэ класс 15 щатIупщыгъ, кIэлэеджэкIо 209-рэ ахэм ащырагъаджэ. Классмэ ащыщэу бгъур федеральнэ проектэу «Мэкъу-мэщым пае IофышIэхэр» зыфиIорэм хэхьагъэх, джыри классихмэ ежь-ежьырэу мэкъу-мэщ лъэны­къом зыщаушэты.
Рагъаджэрэмэ методическэ IэпыIэгъу язытырэр МКъТУ-м иIофышIэхэр ары. Джащ фэдэу апшъэрэ еджапIэм къэгъэлъэгъонэу «Неущырэ мэкъумэщ зэгъусэныгъэм пае» зыфиIорэр щыкIуагъ: гъэсэныгъэ организацие пэрытхэм ыкIи хъызмэтшIапIэхэм инновационнэ технологиехэр ащ къыщагъэлъэгъуагъэх, мэкъумэщ гъэсэныгъэм инеущ зыфэдэщтым игъэкIоты­гъэу тегущыIагъэх. МКъТУ-м икIэлэегъаджэхэр, мэкъу-мэщымкIэ ыкIи гъэсэныгъэмрэ шIэныгъэмрэкIэ министерствэхэм ялIыкIохэр, компаниехэу «Унэ шхъуантI» ыкIи «Лэгъупкъопс» зыфиIохэрэм япащэхэр форумым къыщыгущыIагъэх. Iофтхьабзэм икIэухым МКъТУ-м икIэлэегъаджэмэ мастер-классхэр къатыгъэх: IэпэIэсэныгъэ зыхэлъхэр яшIэныгъэхэмкIэ ыкIи осэшхо зиIэ яIофшIагъэхэмкIэ къадэгощагъэх.