Адыгэ орэдыр анахь дэгъоу къэзыIорэ ныбжьыкIэхэм яреспубликэ зэнэкъокъу рагъэжьагъ. Адыгабзэм икъэухъумэн Iофтхьабзэр фэIорышIэ.

АР-м культурэмкIэ иминистрэ игуадзэу Кушъу Светланэ зэнэкъокъум пылъ шапхъэхэр къыIотагъэх.
— АР-м культурэмкIэ и Министерствэ, гуманитар ушэтынхэмкIэ Адыгэ республикэ институтым и Проектнэ офис ыкIи АР-м иконцерт зэхахьэ зэнэкъокъум кIэщакIо фэхъугъэх. Ащ илъэс 17-м щегъэжьагъэу 30-м нэс зыныбжьыхэр хэлажьэх. Зэнэкъокъур уцугъуитIоу рекIокIыщт. Апэрэ уцугъом онлайн шIыкIэм тетэу видеотехыгъэхэр орэдыIо ныбжьыкIэхэм къагъэ­хьыщт. ОсэшI купым анахь орэдыIо дэгъухэр къыхихыщт. Тыгъэгъазэм и 15-м ныбжьыкIэхэр ятIонэрэ уцугъом рагъэблэгъэщтых. Зэнэкъокъум ишапхъэхэм къызэрэдалъытэрэмкIэ, орэдыIо ныбжьыкIэхэм къыхахыхэрэр щыIэныгъэм исыд фэдэрэ лъэныкъуи фэгъэхьыгъэн ылъэкIыщт. Зэнэкъокъум цIыфыбэ къекIуа­лIэмэ, зэфэхьысыжьхэр тшIыщтых, — къыIуагъ Кушъу Светланэ.
«Бзэр зимыIэм псэ иIэп». Адыгэбзэ бай дэдэу тиIэр орэдышъом илъэу къэIуным мэхьанэшхо иI. Тилъэпкъ идэхагъэ орэдхэм къагъэлъагъо. КъыткIэхъу­хьэрэ лIэужхэм ар агурыгъэIогъэныр пшъэрылъ шъхьа­Iэу зэхэщакIохэм зыфагъэуцужьыгъ. Сэнаущыгъэ зыхэлъ орэдыIо ныбжьыкIэхэр къыхэгъэщыгъэнхэм, адыгабзэр къэухъумэгъэным зэнэкъокъур афэлажьэ.
Хэлажьэ зышIоигъо орэдыIо ныбжьыкIэхэм электроннэ почтэу Info@cora.ru. зыфиIорэм видеотехыгъэ­хэр агъэхьын алъэкIыщт.
Лъэпшъыкъо Фатим.