Псыхъоу Лабэ инэпкъэу Адыгеим ишъолъыр хахьэрэр зэрагъэцэкIэжьыгъэм ишIуагъэкIэ псэупIиблыр псыр къа­кIэоным щаухъумагъэх.

Кощхьэблэ районым ит псэупIэу Натырбые псы­хъоу Лабэ исэмэгу нэпкъ щагъэкIэжьыгъ. Километ­рэм ехъурэ Iахьыр псыкъи­уным ыкIи нэмыкIэу псым иягъэу къэкIощтхэм псэу­пIэхэр ащыухъумэ гъэнхэм, гидротехническэ псэуалъэхэр щынэгъончъэ шIыгъэнхэм афыте­гъэпсыхьэгъэ федеральнэ проектым къыдыхэ­лъытагъэу 2024 — 2025-рэ илъэсхэм агъэцэкIэ­жьыгъ. ПстэумкIи сомэ миллион 78,1-у пэIухьа­гъэм щыщэу миллион 67,5-р псы къэкIуапIэхэмкIэ Федеральнэ агентст­вэм къытIупщыгъ.
Псы нэпкъыр зэхэо­гъагъ, псыIушIэм ышъ­хьагъ гъэпытэгъагъэп, уц шIой­хэм, куандэхэм зэлъакIугъагъ. Псым къыха­хъомэ, нэпкъхэм къадэ­кIынышъ, Кощхьэблэ районым ипсэупIиблымэ къа­дэхьаным, гъогухэм, электричествэм, зэпхыныгъэм якIуапIэхэм къакIэхьаным ищынагъо щыIагъ.
Ащ фэдэ ошIэ-дэмышIэ Iоф къэхъумэ, зэрарэу къыхьыщтыр сомэ мил­ли­он пчъагъэм нэсын ылъэ­кIыщт.
ПсэолъэшIхэм псы нэпкъыр зэтырагъэуцожьыгъ, ыбгъукIэ мыжъохэр Iуалъхьагъэх, ышъхьагъ пшэ­хъо-мыжъокIэ зэхэлъ тыратэкъуагъ.
«Проектэу агъэцэкIа­гъэм ишIуагъэкIэ гидротехническэ псэуалъэм псым щиухъумэнхэ пшъэ­рылъэу иIэр зэтегъэуцо­жьыгъэ хъугъэ. Джы гектар минитфым ехъурэ чIыгоу унэ 400 фэдиз зытетыр, нэбгырэ минрэ 700-рэ зыщыпсэурэр псыкъиуным щыу­хъумагъ», — къыIуагъ псы къэкIуа­пIэхэмкIэ Федеральнэ агентствэм ипащэ игуа­дзэу Наталия Сологуб.
— ПсэупIэхэр псыкъиуным щыухъумэгъэнхэр — шъолъыр ыкIи чIыпIэ хэбзэ IофышIэхэм япшъэ­рылъ шъхьаIэхэм ащыщ. Псы къэкIуапIэхэмкIэ Фе­деральнэ агентствэм Iоф датшIэзэ псыхъохэм яукъэ­бзынрэ нэпкъхэм ягъэпытэнрэ игъорыгъоу тэгъэцакIэ; зыми имые гидротехническэ псэуа­лъэхэр е Iутэхых, е муниципальнэ мылъкум хэтэгъахьэх. ПэшIорыгъэ­шъэу тызекIоным тыпылъ, гумэкIыгъо къызпыкIын ылъэкIыщт чIыпIэхэр тэгъэнафэх ыкIи тэгъэтэ­рэзых тицIыфхэм зэрар яхыгъэ мыхъуным фэшI, — къащитхыгъ исоциаль­нэ нэкIубгъохэм Адыгеим и ЛIышъхьэ.
Псы къэкIуапIэхэмкIэ Федеральнэ агентствэм ипресс-къулыкъу