Къэралыгъо IэпыIэгъур къэлэжьыгъэным епхыгъэ проект зыгъэцэкIэрэ купхэр Тэхъутэмыкъое районым щызэIукIагъэх ыкIи къэгъэлъэгъон ащ къыщатыгъ.

Адыгеим илъэпкъ культурэ зыухъумэрэ творческэ купхэу «Уджыр», «Адыгэ­хэр», «Джэныкъор» зэхахьэм хэлэ­жьагъэх. Лъэпкъ культурэм и Гупчэрэ Адыгэ Республикэм культурэмкIэ и Министерствэрэ ащ кIэщакIо фэхъугъэх.
Тэхъутэмыкъое районым иансамблэ­хэу «Уджыр», «Адыгэхэр» ыкIи Шэуджэн районым иансамблэу «Джэныкъор» Урысые фестиваль-зэнэкъокъум хэлэ­жьагъэх ыкIи текIоныгъэ къадахыгъ, сомэ миллион тIурытIу къалэжьыгъ. Мылъкум ишIуагъэкIэ ансамблхэм яамал­хэм ахэхъуагъ. Мыщ фэдэу зэхэт къэгъэлъэгъон творческэ купищмэ къызэратырэр апэрэ.
Тэхъутэмыкъое ыкIи Шэуджэн районхэм ятворческэ купхэу грантхэр къэзы­хьыгъэхэм концерт дахэ къатыгъ, ясэнаущыгъэ цIыфмэ арагъэлъэгъугъ ыкIи язэкъошныгъэ агъэпытагъ.
— Лъэпкъ творчествэм и Къэралыгъо Урысые Унэу В. Д. Поленовым ыцIэ зыхьырэр зызэхащагъэр илъэси 110-рэ хъугъэ. Ащ фэгъэхьыгъэ мэфэкI Iоф­тхьабзэм хэлэжьагъэх Тэхъутэмыкъое ыкIи Шэуджэн районхэм ятворческэ купхэу «Удж», «Адыгэхэр», «Джэныкъу» зыфаIохэу грантхэр къэзыхьыгъэхэр. Культурэм хэхъоныгъэ ышIынымкIэ мыщ фэдэ зэIукIэгъухэм мэхьанэшхо яI. Твор­ческэ купхэр яIэпэIэсэныгъэкIэ зэхъо­жьых. Мыщ фэдэ гъэхъагъэ зиIэ купхэр Адыгеим щызэлъашIэнхэ фае, — къы­Iуагъ Тэхъутэмыкъое районым куль­ту­рэмкIэ и ГъэIорышIапIэ ипащэу Хьатит Нурдин.
Ижъырэ адыгэ орэдхэр къэзыIорэ лъэпкъ ансамблэу «Джэныкъом» творческэ купхэм я Урысые фестиваль-­зэнэкъокъоу 2023-рэ илъэсым Астрахань щыкIуагъэм текIоныгъэр къыщыдихыгъ ыкIи миллионитIу хъурэ грантыр къыфагъэшъошагъ. Лъэпкъ проектэу «Культурэм» къыдыхэлъытэгъэ Iофтхьабзэхэм ахэтэу зэнэкъокъур зэхащэгъагъ. Охътэ кIэкIым ансамблэр зэлъашIагъ.
— Грантым ихьатыркIэ «Джэныкъом» пае шъуашэхэри, Iэмэ-псымэхэри къэт­щэфыгъэх. Дунэе хъытыум нахь тыдэлэжьэнэу тыублагъ. Тиамалхэм къахигъэхъуагъ, IэпыIэгъушхо къытфэхъугъ. Непэрэ творческэ зэIукIэм купхэр нахь зэпэблагъэ тызэфишIыгъ, — къыIуагъ «Джэныкъом» ипащэу Исуп Заур.
Лъэпкъ Iэмэ-псымэхэм къязыгъэIорэ купэу «Уджыр» Тэхъутэмыкъое районым щэлажьэ. 1993-рэ илъэсым ар зэхащэгъагъ. «Народнэ творчествэмкIэ Урысые Федерацием изаслуженнэ куп» зыфиIорэ цIэр бэмышIэу ащ къыфагъэшъошагъ. 2021-рэ илъэсым Рязань щыкIогъэ зэнэкъокъум хэлэжьагъ, грант IэпыIэгъур къылэжьыгъ.
— Тикультурэ идэхагъэ къызщыд­гъэлъэгъогъэ творческэ зэIукIэ тиIагъ. Купищыми лъэныкъо зэфэшъхьафхэр къэдгъэлъэгъуагъ. Лъэпкъ Iэмэ-псымэхэу тызщыкIэхэрэр, микрофонхэр, шъуа­шэхэр грантым ишIуагъэкIэ тщэфыгъэх. Урысыем икъалэхэм тащыIагъ, — къыIуагъ «Уджым» ипащэу Къэлэкъутэкъо Инвер.
Лъэпкъ къэшъокIо ансамблэу «Адыгэ­хэри» Тэхъутэмыкъое районым щэлажьэ. Купыр зыщыIэр илъэс 12 хъугъэ, 2019-рэ илъэсым грантыр къафагъэшъошагъ. Адыгэ къашъохэм ядэхагъэ дунаим ичIыпIэ зэфэшъхьафхэм къащагъэлъагъо. БэмышIэу артистхэр Таиланд къикIы­жьыгъэх.
— Грантым мэхьанэшхо иI. Зы рес­публикэ цIыкIум щылэжьэрэ купищмэ илъэс зэкIэлъыкIохэм текIоныгъэ къызэрэдахыгъэм урыгушхонэу щыт. ТапэкIи тилъэпкъ ыцIэ дахэкIэ рядгъэIощт,— къыддэгощагъ лъэпкъ къашъохэмкIэ ан­сам­блэу «Адыгэхэр» зыфиIорэм ипащэу Мерэмыкъо Артур.
Творческэ купхэр концертым щагъэ­шIуагъэх, лъэпкъ культурэмкIэ АР-м и Гупчэ ищытхъу тхылъхэр ахэм япащэхэм афагъэшъошагъ.
Лъэпшъыкъо Фатим.