Лъыхъоныр лъагъэкIуатэ
Урысыем ошIэ-дэмышIэ IофхэмкIэ и Министерствэ илъыхъокIо отряд хэтхэм Краснодар щыщ, илъэс
42-рэ зыныбжь зекIо хъулъфыгъэу кIодыгъэм ыгъэфедэщтыгъэ бэщхэр къушъхьэу ТIыбгэ икъушъхьэтхитIу зыщызэуалIэхэрэм дэжь къыщагъотыжьыгъэх.
ЫпэкIэ макъэ къызэрагъэIугъагъэу, Краснодар щыщ хъулъфыгъэу илъэс 42-рэ зыныбжьыр инэIосэ бзылъфыгъэ горэ игъусэу зекIо кIогъагъэ. ШэкIогъум и 17-м ежь изакъоу къушъхьэу ТIыбгэ (метрэ 3064-рэ илъэгагъ) ышыгу нэсынэу ежьэгъагъ. Бзылъфыгъэр чэщ-зымафэм ащ ежэу базэм илагерь дэсыгъ, шэкIогъум и 18-м ежь-ежьырэу псэупIэу Гъозэрыплъэ нэси, заповедникым иIофышIэхэм къэбарыр къафиIотагъ.
ОшIэ-дэмышIэ IофхэмкIэ Министерствэм щылажьэхэрэм альпинист Iэмэ-псымэхэр къызфагъэфедэхэзэ къушъхьэтх къогъупэхэр зэкIэ къаплъыхьащтых, бэщэу къагъотыгъэхэр зыдэщыIэхэ чIыпIэм ычIэгъ ары анаIэ нахь зытырагъэтыщтыр.