Лэжьыгъэм и Мафэ Адыгеим джырэблагъэ зыщыхагъэунэфыкIым, «Мэкъумэщ лIэуж» зыфиIорэ лъэныкъомкIэ къыхагъэщыгъ Тэхъу­тэмыкъое районым щыщ Шъхьэлахъохэм яунагъо. ПстэумкIи зэхэубы­та­гъэу илъэс 81-рэ хъугъэ ахэр чIыгулэжьыным зыпылъхэр.

Шырахьмэт
2002-рэ илъэсым Шъхьэлэхъо Шырахьмэт Афыпсыпэ ­псэупIэ коим щигъэпсыгъагъ ылъэкъуацIэ зыфиусыжьыгъэ мэкъумэщ-фермер хъызмэтшIапIэр. А уахътэм ащ мэкъумэщ хъызмэтым епхыгъэ шIэныгъэ куу, IэпэIэсэныгъэ IэкIэлъ хъу­нэу игъо ифагъэу щытыгъ.
1960-рэ илъэсэу Пэнэхэс игурыт еджапIэ къызиухыгъэм къыщегъэжьагъ пIоми хъунэу, ищыIэныгъэ мы лъэныкъом епхыгъагъ. А лъэхъаным Iоф­шIэгъэ илъэсхэр уиIэнхэ фэягъ мэкъумэщ хъызмэтым зыщыфырагъэджэхэрэ апшъэрэ еджа­пIэм учIэхьаным пае. Ащ фэшI, еджапIэм дэгъоу щеджагъ нахь мышIэми, къызычIэкIым, Хьа­хъуратэм ыцIэ зыхьырэ колхо­зэу икъуаджэ зыхэтым хэхьэгъагъ. ИлъэситIурэ ащ щылэжьагъэу Пшызэ мэкъумэщ университетым, ащыгъум институтыгъ, чIахьи агроном сэнэхьатыр щызэригъэгъотыгъагъ. 1967-рэ илъэсым къызеухым, иколхоз гупсэ къыгъэзэжьыгъагъ.
Шырахьмэт отделением иаг­рономэу ригъэжьэгъагъ, илъэс­ныкъо нахьыбэ темышIэу кол­хозым иагроном шъхьаIэ ашIыгъагъ. 1972-рэ илъэсым къо­джиплIыр — Афыпсыпэ, Пэнэ­­хэс, Псэйтыку ыкIи Хьа­щтыку — зыхэхьэхэрэ мэкъумэщ хъыз­мэтшIэпIэшхоу Хьахъуратэм ыцIэ зыхьырэм ипащэу агъэнэфэгъагъ.
Шырахьмэт пэщэныгъэ зы­дызэрихьэрэ хъызмэтшIапIэм кIочIаби, чэщ мычъыяби хилъхьагъ, ау зыпарэкIи икъэгъэ­лъэгъонхэм къащигъэкIагъэп, хэхъоныгъэхэр ышIызэ, пэрытныгъэр зыIыгъхэм ясатырэ хэтэу лъыкIотагъ. Лэжьыгъэ бэгъуагъэ сыдигъокIи къырахыжьыным зэрэфэбанэщтыгъэм имызакъоу, цIыфэу щылажьэхэрэм ящыIакIэ нахьышIу хъуным, псэукIэ амал тэрэзхэр яIэнхэм ар пы­лъыгъ. Ащ ишIушIагъэкIэ псэолъэ зэ­фэшъхьафыбэ, гъогухэм, псым икIуапIэхэм къащегъэжьагъэу, культурэм иунэ­хэм, еджапIэхэм анэсыжьэу, мы къуаджэхэм ащагъэуцугъ, ащагъэпсыгъ.
Руслъан
Шырахьмэтрэ ишъхьэгъусэу Сулыетрэ зы кIалэрэ пшъэшъитIурэ зэдапIугъ. ИцIыкIугъом къыщыублагъэу тыр щы­сэтехыпIэу зиIэгъэ Руслъани ищыIэныгъэ мэкъумэщ хъызмэтым рипхыгъ. Ятэ алъэкъуацIэ зыфиусыжьыгъэ хъызмэтшIапIэр зегъэпсым, ащ Пшызэ мэкъумэщ университетым псэолъэшI сэнэхьатэу щызэригъэгъотыгъэмкIэ Iоф ышIэнэу игъо ифагъэу щытыгъ. Ар къыгъэтIылъи ятэ игъусэу чIыгулэжьыныр зэдырагъэ­жьэгъагъ.
ХъызмэтшIапIэр загъэпсыгъэм ыуж илъэс нахьыбэ темышIэзэ, 2003-рэ илъэсым, мы Iофым хэшIыкI фызиIэ Шырахьмэт Адыгэ Республикэм мэкъу­мэщ хъызмэтымкIэ иминистрэу агъэнафи, Мыекъуапэ кIожьын фаеу хъугъагъэ. Руслъан тым ычIыпIэ иуцуагъ.
Уахътэр къызэрыкIуагъэп, мэкъумэщ хъызмэтым къиныгъуабэ къызэпичы­щтыгъ, ом изэхъокIыныгъэхэм, чIыгум изытет яIофшIэн зэряпхыгъэм имыза­къоу, чылэпхъакIэхэмкIи, чIыгъэшIухэмкIи, техникэмкIи зыпкъитыныгъэ къэралы­гъом илъыгъэп, мы лъэныкъом щыла­жьэхэрэм Iофыгъуабэ апэ къикIыщтыгъ. Арэу щытми, Руслъан ишIэныгъи, ыкIуа­чIи, ищэIагъи икъугъэх, яунэе хъыз­мэтшIапIэ зэтыригъэзыгъэп, ары па­кIошъ, хэхъоныгъэхэр ригъэшIыгъэх. 2006-рэ илъэсым къыщегъэжьагъэу ащ пэщэныгъэ дызэрехьэ.
Амран
Унагъом чэщи мафи зигугъу щашIэу, зыуж итхэу, ынэгу кIэт зэпытыр ыгукIэ къыхихыгъ Руслъан ишъэо закъоу Амрани. Ари ятэжърэ ятэрэ ягъогу техьагъ.
Ятэжъ фэдэу Амран Пшызэ мэкъумэщ университетым агроном сэнэхьатыр щызэригъэгъотыгъ. 2015-рэ илъэсым ар къыухи къызегъэзэжьым, иунагъо ыгъэ­псыгъэ хъызмэтшIапIэм IофшIэныр щы­ригъэжьагъ. Ащ къыщыублагъэу ар игъэIорышIакIу. Джащ фэдэу заушъомбгъуи, Адыгеим и Красногвардейскэ ыкIи Краснодар краим и Шытхьэлэ районхэм ащагъэпсыгъэ хъызмэтшIапIэхэм яучредительхэм Амран ащыщ.
ХъызмэтшIапIэр
Шъхьэлахъохэм тызэрэщагъэгъоза­гъэмкIэ, непэ ежьхэм яунаеуи, Афыпсыпэ, Пэнэхэс, Псэйтыку ыкIи Хьащтыку ащыпсэухэрэм ячIыгу Iахьэу бэджэндэу аштагъэуи гектар 1780-рэ Тэхъутэмыкъое районым щалэжьы. Ащ ипроцент 77-м коц, хьэ, рапс, тыгъэгъазэ къыщагъэкIых, адрэ къанэрэр пынджлэжьыпI.
IофшIэнхэм япроцент 85-р ежьхэм акIуачIэкIэ зэшIуахы. Ащ ищыкIэгъэ техникэр аIэкIэлъ, имыкъумэ, нэмыкIхэр къырагъэблагъэх. Ялэжьыгъэ зыщаIы­гъыщт гъэтIылъыпIэхэри яIэх.
Лэжьыгъэ чылэпхъакIэхэм якъыхэхын лъэшэу анаIэ зэрэтетыр хъызмэтшIапIэм къыщыхагъэщы. Игъом ахэр зэблахъунхэм, «элитнэкIэ» алъытэрэ лъэпкъхэр агъэфедэнхэм ыуж итых. Ащ имыза­къоу, цифрэ шIыкIэр, IэрышI акъылыр агъэфедэзэ тыкъэзыуцухьэрэ дунаим иягъэу къэкIощтыр нахь макIэ шIыгъэным дэлажьэх. А зэпстэумэ яшIуагъэкIэ илъэс къэс лэжьыгъэу къырахыжьырэми, ащ идэгъугъи ахэхъо, пэрытныгъэр респуб­ликэм щызыIыгъхэм ащыщых.
ХЪУТ Нэфсэт.