Урысые Федерацием экономикэ хэхъоныгъэмкIэ иминистрэу Максим Решетниковым шъолъырхэм япащэхэм адыриIэгъэ зэIу­кIэу щы­Iагъэм Адыгеим и ЛIы­шъхьэу КъумпIыл Мурат пэIудзыгъэ шIыкIэм тетэу хэлэжьагъ.

Шъолъырхэм ясоциальнэ-­экономикэ хэхъоныгъэкIэ унэе программэхэм 2025-рэ илъэсым афэхъугъэ кIэуххэм ыкIи 2026-рэ илъэсымкIэ гухэлъэу яIэхэм щатегущыIагъэх.
«ЗэкIэ шъолъырхэм япрограммэхэр зытегъэпсыхьэ­гъагъэхэр лъэпкъ гухэлъхэмрэ стратегическэ пшъэ­рылъхэмрэ язэшIохын ары. Экономикэм ихэхъоныгъэ, зекIонри зэрэхэтэу, инвес­тициехэр нахьыбэ шIыгъэнхэм, бизнес цIыкIум IэпыIэгъу етыгъэным ахэр япхыгъагъэх. Iофтхьабзэхэм яихъу­хьан кIо зыхъукIэ ахэр мас­тер-планхэм, шъолъырхэм ястратегическэ Iофыгъохэм, нэмыкI лъэныкъохэу федеральнэ гупчэм IэпыIэгъоу къаритырэр зыщагъэфедэ­хэрэм арапхых. Шъолъырхэм яэкономикэкIэ программэхэу зэхагъэуцохэрэм яшIуагъэу къакIорэр нахьыбэ мэхъу», — къыIуагъ Максим Решетниковым.

КъызэрэхагъэщыгъэмкIэ, унэе программэхэм яапэрэ Iахь (2020 — 2024-рэ илъэс­хэр) къыгъэшъыпкъэжьыгъ шIуагъэу ахэм къатырэр: шъолъырхэм инфраструктурнэ ыкIи производственнэ проектхэр зэшIуахынхэ алъэ­кIыгъ, цIыфхэу IофшIэн зэ­рагъэгъотыхэрэм япчъагъэ хагъэхъуагъ, инвестициехэмкIэ амалэу яIэхэри нахьышIу ашIын алъэкIыгъ. 2030-рэ илъэ­сым нэс телъытэгъэ чэ­зыум шъолъырхэм язытет къыдалъытэзэ, Iофтхьабзэхэр агъэнэфэнхэмкIэ амал яIэщт.
Унэе программэм телъытагъэу Адыгеим Iофэу щашIагъэм фэгъэхьыгъэ псалъэр КъумпIыл Мурат къызешIым, Максим Решетниковым респуб­ликэм ынаIэ къызэрэтыригъэтырэм пае зэрэфэразэр къы­Iуагъ. АР-м и ЛIышъхьэ къызэрэхигъэщыгъэмкIэ, респуб­ли­кэм социальнэ-экономикэ хэ­хъоныгъэмкIэ иунэе программэ 2024-рэ илъэсым ыухыгъ, федеральнэ гупчэм къытыгъэ IэпыIэгъуми ащкIэ ишIогъэшхо къэкIуагъ. Мы илъэсым къыщегъэжьагъэу илъэси 6-м телъы­тэгъэ унэе программакIэр рагъэжьагъ. ПстэумкIи сомэ мил­лиарди 6 фэдиз хъущт ащ пэ­Iухьащтыр.
«Президентэу Владимир Путиным, Урысыем и Прави­тельствэ яIэпыIэгъу ишIуагъэкIэ 2025 — 2030-рэ илъэсхэм ­ашIыщт социальнэ-экономикэ хэхъоныгъэм иунэе программакIэ зэшIохыгъэным иамал Адыгеим иIэ хъугъэ. Ыпэрэ программэм республикэм амал къыритыгъ инфраструктурнэ пшъэрылъхэм язэшIохынкIэ хэпшIыкIэу лъыкIотэнэу. Илъэсихэу къытпыщылъым экономикэм ихэхъоныгъэ тынаIэ нахь тедгъэтыщт, ащ къыхеубытэх бизнес цIыкIумрэ гурытымрэ IэпыIэгъу ятыгъэнымкIэ Iоф­тхьэбзэ гъэнэфагъэхэр», — къы­хигъэщыгъ КъумпIыл Мурат.
2025 — 2030-рэ илъэсхэм ателъытэгъэ программэм илъэ­хъан Адыгеим Iофтхьэбзэ ини 7 щызэшIуахынэу агъэнэфагъ, ахэм ащыщэу 5-р мы илъэсым зэшIохыгъэ хъущт. Промышленнэ инфраструктурэм зегъэу­шъомбгъугъэным, инвесторхэм анаIэ нахь лъэшэу республикэм къытырадзэным ахэр фытегъэ­псыхьэгъэщтых. Гухэлъхэр гъэ­цэкIагъэ хъунхэм пае къэлэ­гъэпсыкIэ зиIэ псэупIэу Инэм промышленнэ шъолъырыр щыгъэпсыгъэнымкIэ Iофтхьабзэхэм язэшIохын лъэкIуатэ. А про­мышленнэ паркым рези­дентхэм анаIэ къытырадзагъ, республикэм иэкономикэ хэ­хъоныгъэ ин ышIынымкIи гугъа­пIэхэр къетых. ТапэкIэ гухэлъхэу тиIэхэм ащыщ промышленнэ шъолъырэу «Инэм» зыфиIорэм зегъэушъомбгъугъэныр ыкIи квадрат метрэ 8000 хъущт промышленнэ унэр ащ щыгъэпсыгъэныр. Проектыр хьазыр, къэралыгъо экспертизэм пае ищыкIэгъэ тхылъхэри зэхагъэуцох.
ЯтIонэрэ Iофтхьабзэм къыдыхэлъытагъэу сомэ миллион 204,6-рэ фэдиз хъурэ чIыфэхэр гъогогъу 58-рэ къаратыгъэх. ХэхъоныгъэмкIэ Фондым къи­хьащтым телъытагъэу промышленнэ предприятиехэм аща­гъэфедэрэ Iэмэ-псымакIэхэр къэщэфыгъэнхэм ыкIи щыIэхэр гъэцэкIэжьыгъэнхэм апае сомэ миллион 520-рэ къаIэкIэхьащт. А ахъщэм ишIуагъэкIэ промышленнэ предприятиехэм зэзэ­гъыныгъи 5 адашIын алъэкIыгъ. Джыри ахэплъэнхэу лъэIу тхы­лъи 9 щыI. Программэм къыдилъытэрэ нэмыкI Iофтхьабзэр зыфытегъэпсыхьагъэр бизнес-­инициативэхэм IэпыIэгъу ятыгъэныр ары. ХэтэрыкIхэм ыкIи цумпэ лъэпкъхэм якъэхьы­жьын­кIэ проектхэм япхырыщын сомэ миллиони 100 фэдиз мы илъэсым пэIуагъэхьанэу рахъухьагъ. Зэнэкъокъоу зэхащагъэм фэ­хъугъэ кIэуххэм атетэу ахъщэр субсидие фэдэу атырагощагъ. Зэнэкъокъум хэлэжьагъэхэм ащыщэу 30-мэ текIоныгъэр къыдахыгъ.
АР-м и ЛIышъхьэ къызэрэхигъэщыгъэмкIэ, унэе программэм къыдилъытэрэ Iофтхьа­бзэхэр зэшIохыгъэ зыхъухэкIэ, 2030-рэ илъэсым нэс инвестицие тедзэхэр къаIэкIэхьащтых, бюджет зэфэшъхьафхэм афэ­кIорэ хэбзэIахь ыкIи мыхэ­бзэIахь ахъщэри нахьыбэ ­хъущт, IофшIэпIэ чIыпIакIэхэр зэха­щэщтых. Мы илъэсым унэе программэм къыдыхэлъытагъэу IофшIэпIэ чIыпIэ 60 щыIэ хъу-
гъэ, бюджетым къыхимыубытэрэ инвестициехэр сомэ миллион 76,2-рэм нэсыгъэх. ШэкIо­гъум ыкIэм ехъулIэу программэм къыдилъытэрэ мылъкур зэкIэ аIэ къырагъэхьащт.
«Мы илъэсым ыкIэм ехъулIэу унэе программэм къыди­лъытэхэу 2025-рэ илъэсымкIэ агъэнэфэгъагъэхэр зэшIохыгъэ хъущтых. Илъэсэу къихьащтым а Iофтхьабзэхэр лъагъэкIотэщтых. ЗекIо-рекреационнэ паркэу «ДжэгокIо гъэхъунэр» зыфиIоу ашIыщтым пае инфраструктурэм игъэпсынкIэ мэхьа­нэшхо зиIэ Iофтхьабзэм игъэцэ­кIэн рагъэжьэщт», — къыIуагъ КъумпIыл Мурат.
АР-м и ЛIышъхьэ пресс-къулыкъу
къытырэ къэбархэмкIэ
Тхьаркъохъо Сафыет.