Телевидением и Дунэе Мафэ къыдыхэлъытагъэу, Федеральнэ партийнэ проектэу «Урысыер цифрэ шапхъэм тетыныр» зыфиIорэм ишъолъыр къутамэ Iэнэ хъурае ты­гъуасэ зэхищагъ.

Цифрэ шапхъэм тет журналистикэм инеущрэ мафэ зыфэ­дэщтым, шIыкIакIэхэм ыкIи уахътэм къыгъэуцурэ пэрыохъу­хэм ар афэгъэхьыгъагъ.
Iофтхьабзэм хэлэжьагъэх республикэ къэралыгъо хабзэм икъулыкъухэм къэбар жъугъэм иамалхэм ялIыкIохэр.
Партийнэ проектэу «Урысыер цифрэ шапхъэм тетыныр» зыфиIорэм ишъолъыр координаторэу Хьамыкъо Анзаур Iэнэ хъураер къызэIуихыгъ ыкIи зэ­рищагъ.

— Мы проектыр Урысые по­литическэ партиеу «Единэ Рос­сием» 2022-рэ илъэсым жъоныгъуакIэм къыщегъэжьагъэу егъэцакIэ. Ащ ипхырыщын 2023-м Адыгеим щаублагъ. Проектым имурадыр — щыIэныгъэм илъэныкъо зэфэшъхьаф­хэр цифрэ шъуашэм игъэхьа­гъэнхэр, тикъэралыгъо и ИТ IэпыIэгъу фэхъугъэныр, урысые цифрэ сервисхэр ыкIи шIыкIа­кIэхэр лъыгъэкIотэгъэнхэр. Ащ епхыгъэу мыр лъэныкъо зэфэшъхьафхэм афэгъэзагъ: ИТ-компаниехэм IэпыIэгъу афэхъугъэ­ныр, зэдэгъэлэжьэгъэнхэр, цифрэ шIэныгъэм хэгъэхъогъэныр, хэушъхьафыкIыгъэ дзэ операцием иветеранхэм Iоф адэшIэгъэныр. Непэ тызфызэIукIагъэр джырэ медиам хэхъоныгъэ ышIы­нымкIэ Iофыгъохэм, цифрэ шъуашэм техьэгъэным ыкIи Iэ­рышI акъылым журналистикэм къыфихьыщтым татегущыIэныр ары, — хигъэунэфыкIыгъ Хьамыкъо Анзаур.

Къэралыгъо телерадиокомпаниеу «Адыгеим» ипащэу Ацумыжъ Адам «Телевидениер цифрэ лъэхъаным: сыдэущтэу цыхьэ къызфябгъэшIыщта ыкIи къытэплъыхэрэм япчъагъэ къы­зэтебгъэнэщта?» зыфиIорэ те­мэр къыIэтыгъ.
— ЫпэкIэ программэ гъэнэфагъэр къызщыдэкIыщт уахътэм ыкIи ар къэзыгъэлъэгъощт каналым ежэхэу зэрэщытыгъэм фэмыдэу, джы цIыфхэр ежь зыщыфаем яплъыжьынхэ алъэ­кIы хъугъэ. Къытэплъыхэрэм япчъагъэ къызэтегъэнэгъэныр ыкIи хэгъэхъогъэныр непэ Iо­фы­гъо шъхьаIэу къэуцу, — къы­Iуагъ Ацумыжъ Адам.
Iэнэ хъураем къыщыгущыIагъэхэм ащыщ республикэ гъэзе­тэу «Советскэ Адыгеим» иредактор шъхьаIэу Цундышк Зарэ. Цифрэ шапхъэр ыкIи шIыкIа­кIэхэр гъэзетхэм зэрагъэфедэ­рэр ащ къыIотагъ. Джащ фэдэу университетымрэ къэбар жъугъэм иамалхэмрэ акIуачIэ зэ­хэлъэу журналистхэм ягъэхьазырынкIэ Iофыгъоу къэуцухэрэм къатегущыIагъ.
Iофтхьабзэм икIэщэкIохэм ыкIи хэлэжьагъэхэм зэфэхьысыжь зэрашIыгъэмкIэ, къаIэтыгъэ Iофыгъохэм язэшIохын тапэкIи дэлэжьэщтых, ягукъэкIхэр ыкIи медиапроектхэр зэдагъэцэкIэщтых.
Iэшъынэ Сусан.