ЛIыхъужъым IукIагъэх
Мыекъуапэ илицееу N 34-м лIыхъужъныгъэм иурок джырэблагъэ щыкIуагъ.
Мы еджапIэм иапшъэрэ классхэм арыс ныбжьыкIэхэм аIукIагъ хэушъхьафыкIыгъэ дзэ операцием иветеранэу, Адыгэ республикэ общественнэ организациеу «ХэушъхьафыкIыгъэ дзэ операцием иветеранхэм я Ассоциацие» итхьаматэ игуадзэу, медалэу «За отвагу» зыфиIорэр къызфагъэшъошагъэу Илья Донцовыр.
Iофтхьабзэм кIэщакIо фэхъугъэх шъолъыр программэу «Адыгеим и ЛIыхъужъхэр» пхырызыщырэ комитетымрэ «Адыгеим иныбжьыкIэхэр» зыфиIорэ Гупчэмрэ.
ДзэкъулыкъушIэным мэхьанэу иIэр къагурыгъэIогъэным, ныбжьыкIэхэм патриотическэ пIуныгъэ адызехьэгъэным зэIукIэгъур фэIорышIагъ. «Адыгеим иныбжьыкIэхэр» зыфиIорэ Гупчэм иIофышIэу ХьакIэмыз Заринэ къэзэрэугъоигъэхэр Илья Донцовым нэIуасэ фишIыгъэх.
НыбжьыкIэхэм нахь агу рихьын къышIошIырэ лъэныкъохэр къыригъэубытыхэзэ, шъхьэихыгъэу лIыхъужъыр къадэгущыIагъ. Хэгъэгум итарихъ, къулыкъур зэрихьыгъэм икъэбар, гуфакIоу хэушъхьафыкIыгъэ дзэ операцием зэрэхэлэжьагъэр къафиIотагъ. Хэгъэгум иухъумакIохэмкIэ физическэ ыкIи гукIочIэ ухьазырыныгъэм анахь мэхьанэ зэриIэр къыхигъэщыгъ.
— Хэгъэгу зэошхом илъэхъан тятэжъ пIашъэхэм лIыхъужъныгъэу зэрахьагъэр пстэуми тищысэтехыпI. ЛъэхъаныкIэу тызхэтым Урысыер пыим пэуцужьын фаеу зэхъум, ткIуачIэ зэхэлъэу хэгъэгум тыкъоуцуагъ. Сэ сшъхьэкIэ тIогъогогъо гуфакIоу дзэ операцием сыщыIагъ. Къыхэзгъэщымэ сшIоигъу лъэпкъ зэхэдз щымыIэу тидзэкIолIхэр пытэу зэрэзэхэтхэр. ТекIоныгъэр къызэрагъэблэгъэщтым зэкIэри фэбанэх, — къыIуагъ Илья Донцовым.
Джащ фэдэу ветераным къафиIотагъ фронтым ижъотыпIэ мафэхэр зыфэдэхэр, чIыпIэ гъэшIэгъонэу зэрыфэщтыгъэхэр, щыIэкIэ-псэукIэу щыряIэр, нэмыкIхэри.
КIэлэеджакIохэм упчIэу къыратыгъэхэм джэуапхэр къаритыжьыхэзэ, хэтрэ цIыфи иунагъо, и Хэгъэгу къыухъумэнхэу зэрэфаер хигъэунэфыкIыгъ.
Ветераным къызэрэхигъэщыгъэмкIэ, ныбжьыкIэхэм мыщ фэдэ зэIукIэгъухэр афызэхэщэгъэнхэм мэхьанэшхо иI. Джыри Iэтахъохэу дзэкъулыкъушIэ ветеранхэр къазыфакIохэкIэ лъэшэу ашIогъэшIэгъонэу ахэм зэрядэIущтыгъэхэр, ахэм щысэ атырахызэ нэбгырэ пэпчъ ищыIэныгъэ гъогу къызэрэхихыщтыгъэр къэзэрэугъоигъэхэм къафиIотагъ.
ХэушъхьафыкIыгъэ дзэ операцием иветеранхэм ныбжыкIэхэм адыряIэрэ зэIукIэгъухэм якIэщакIор фондэу «Хэгъэгум иухъумакIохэр» зыфиIорэм ишъолъыр къутам ары. ЛIыхъужъныгъэм иурокхэр проектэу «ЛIыхъужъэу къэхъухэрэп» зыфиIорэм къыдыхэлъытагъэх.
КIАРЭ Фатим.