Гъэсэныгъэ проектэу «Адыгеир къызэIух» зыфиIорэм Мыекъопэ районым икIэлэеджэкIо 700-м ехъу хэлэжьагъ. Гъэсэныгъэ гупчэу N 2-м проектыр мэфэкI шIыкIэм тетэу щызэфашIыжьыгъ.

Iофтхьабзэм къыдыхэлъытагъэу сурэт­шIынымкIэ ыкIи сочинение тхынымкIэ текIоныгъэ къыдэзыхыгъэхэр агъэшIуагъэх, щытхъу тхылъхэр аратыгъэх. Нэу­жым лентэ плъыжьыр зэпаупкIыгъ ыкIи бзыхьафхэр агощыгъэх, проектыр зэраухыгъэр ащ къыушыхьатыгъ. Гъэсэныгъэ гупчэм арт-псэуалъэу «Краеугольный камень Адыгеи» зыфиIорэр проектым инэпэеплъэу къыдэнагъ.
Iэнэ хъураер
Шэуджэн, Джэджэ, Теуцожь, Мыекъо­пэ, Тэхъутэмыкъое районхэм ыкIи Мыекъуапэ ялIыкIохэр Iэнэ хъураем хэлэжьагъэх.
Iэнэ хъураем проектыр щызэфахьысыжьыгъ, къэкIорэ илъэсым зэхащэщтхэм атегущыIагъэх. Ахэм ащыщых кIэлэеджакIохэм языгъэпсэфыгъо лъэхъан пэублэ классхэм арыс кIэлэеджакIохэм апае рагъэкIокIыщт Iофтхьабзэхэр, щыIэныгъэм чIыпIэ къин ригъэ­уцогъэ кIэлэцIыкIухэр зэхахьэхэм зэрахагъэлэжьэщтхэр, Кавказ заповедникым эко-квестэу щыкIощтхэр, псэ­ушъхьэ­хэр тешIыхьагъэхэу кIэлэцIыкIу сурэтхэр зэрарагъэшIыщтхэр.
Социальнэ мэхьанэ иI
— Проектым джыри зэ къыушыхьатыгъ краеведениемрэ экологиемрэ ныбжьыкIэхэм зэрашIогъэшIэгъоныр, — къы­Iуагъ мысатыу организациеу «Талантида» зыфиIорэм ипащэу Карен Каракьян. — КIэлэцIыкIухэм ячIыгу шIу ягъэлъэгъугъэн закъор арэп типшъэры­лъыр, мэхьанэ ин зиIэ Iофтхьабзэхэм ахэр чанэу ахэгъэлэжьэгъэнхэр ары.
Проектым изэфэхьысыжьхэр
Кавказ заповедникым иэкспедициехэм кIэлэеджэкIо 410-рэ, эколого-краеведческэ квестхэм нэбгырэ 400 ахэлэ­жьагъ, творческэ зэнэкъокъухэм IофшIэн 51-рэ къырахьылIагъ. Арт-псэуалъэу «Крае­угольный камень Адыгеи» зыфиIорэр зэхагъэуцуагъ.
Проектыр Адыгэ Республикэм игрант IэпыIэгъукIэ зэхащагъ. Лъэпкъ проектхэу «Гъэсэныгъэмрэ» «Экологиемрэ» къадыхэлъытэгъэ пшъэрылъхэм ар адештэ, «Движение Первых» зыфиIорэм зэпхыныгъэ дыряIэу дэлажьэх.