Мы мафэхэм республикэ зэнэкъокъоу «Сыбзэ дахэу адыгабзэ…» зыфиIорэр зэхащагъ. Адыгэ Республикэм гъэсэныгъэмрэ шIэныгъэмрэкIэ и Министерствэрэ сэнэхьат IэпэIэсэныгъэм хэгъэхъогъэнымкIэ Адыгэ республикэ институтымрэ Iофтхьабзэм кIэщакIо фэхъугъэх.

Республикэм икъалэхэм ыкIи ирайонхэм къарыкIыгъэ кIэлэеджакIохэм адыгабзэкIэ усэхэр езбырэу къаIуагъэх, пшысэхэр къаIотагъэх. Нэбгырэ пэпчъ уасэ фэпшIынэу иныдэлъфыбзэ ыгъэбзэрэбзагъ.
Муниципалитетхэм анахь дэгъоу закъыщызгъэлъэгъуагъэхэр ары респуб­ликэ уцугъом къекIолIагъэхэр, ахэр нэбгырэ 34-рэ хъущтыгъэх, я 5 — 8-рэ классхэм ащеджэхэрэр ары зызыушэтыгъэхэр. Мыекъопэ ыкIи Джэджэ районхэм къарыкIыгъэ урыс пшъэшъэжъыитIумэ джащ фэдэу адыгабзэкIэ усэхэр къаIуагъэх. МыекъуапэкIэ Адыгэ респуб­ликэ гимназием, гурыт еджапIэу N 9-м, лицееу N 8-м, гимназиеу N 5-м, ли­цееу N 34-м якIэлэеджакIохэр Iофтхьабзэм чанэу хэлэжьагъэх.

— Адыгабзэм ибаиныгъэ, идэхагъэ ащымыгъупшэныр, агъэлъэпIэныр, ныдэлъфыбзэм зыкъе­гъэIэтыжьыгъэныр ары пшъэ­рылъ шъхьаIэу зыфэдгъэуцужьырэр. Мыгъэ ящэнэрэу зэнэкъокъур зэхэтэщэ. Илъэс 18 фэдиз хъугъэу «Живая классика» зыфиIорэр ретэгъэкIокIы, ныбжьыкIэхэм урысыбзэмкIэ зызэраушэтырэм фэдэу адыгабзэмкIи IэпэIэсэныгъэу аIэкIэлъыр къядгъэгъэлъэгъонэу зитэхъу­хьэм АР-м гъэсэныгъэмрэ шIэныгъэмрэкIэ и Министерствэ къыддыригъэштагъ ыкIи илъэс къэс джы ар зэхэтэщэ. Адыгэ тхакIохэм яусэхэр, пшысэхэр, баснехэр кIэлэеджакIохэм IупкIэу, дахэу къаIох, мэхьанэр къыбгурагъаIоу зыкъыдашIы. Зэнэкъокъум текIоныгъэ къызэрэщыдахыщтыр арэп анахь шъхьаIэр, фэчэфхэу зэрэхэлажьэхэрэр ары, — къыIуагъ сэнэхьат IэпэIэсэныгъэм хэгъэ­хъогъэнымкIэ Адыгэ республикэ институтым иIофышIэу Шорэ Жаннэ.

Iофтхьабзэр адыгэ мэкъамэмрэ ыкIи къашъомрэкIэ аублагъ.
Зэнэкъокъум шэпхъэ гъэнэфагъэу пылъхэр къыдалъытэзэ кIэлэеджакIохэм заушэтынэу аублагъ.
ОсэшIхэм зэрагъэнэфагъэмкIэ, анахь дэгъоу зыкъэзыгъэлъэгъуагъэр Теуцожь районымкIэ къуаджэу Нэшъукъуае дэт гурыт еджапIэу N 8-м икIэлэеджакIоу Блэгъожъ Азэмат. Къуекъо Налбый иусэу «Заор зэраукIыгъэр» зыфиIорэр IупкIэ дэдэу, зыкъыдишIызэ ащ къыIуагъ. Зэо лъэхъаныр нэм къыкIигъэуцоу, усэм икупкI къедэIухэрэм алъигъэIэсыгъ. ТекIоныгъэр фагъэшъошагъ Красногвардейскэ районымкIэ къуаджэу Джамбэчые игурыт еджапIэу N 7-м щеджэрэ Брыцу Роланэ. Хъунэго Саидэ итхыгъэу «Ау сэ упчIэ къыостын» зыфиIорэр ащ къы­Iуагъ. Анахь дэгъуищым ахалъытагъ Теуцожь рай­онымкIэ къуаджэу Пэнэжьыкъуае дэт гурыт еджапIэу N 1-м икIэлэеджакIоу Мыгу Изабэлэ. Пэрэныкъо Мурат итхыгъэу «Мышъэмрэ Баджэмрэ» зыфиIорэр IупкIэу ащ къыриIотыкIыгъ.

ХагъэунэфыкIырэ чIыпIэхэр афагъэшъошагъэх Тэхъутэмыкъое районым игурыт еджапIэу N 7-м щеджэрэ Динара Мискур, гурыт еджапIэу N 24-м къикIыгъэ Мэзыужьэкъо Щамил, Красногвардейскэ районым ит гурыт еджапIэу N 9-м щеджэрэ ЛIыунэе Атланэ, Джэджэ районым ит гурыт еджапIэу N 1-м чIэс ХьакIэмыз Бэллэ, Теуцожь районымкIэ гурыт еджапIэу N 8-м илIыкIоу КIыкI Асфаррэ гурыт еджапIэу N 5-м щеджэрэ МэщлIэкъо Аминэрэ, Кощхьэблэ районым ит гурыт еджапIэу N 3-м икIэлэеджакIоу Бжьэц Маликэ. Джащ фэдэу зэкIэ кIэлэеджакIоу зэнэкъокъум хэлэжьагъэхэм дипломхэр афагъэшъошагъэх. Яныдэлъфыбзэ зыщамыгъэгъупшэнэу, агъэлъэпIэнэу осэшIхэм кIэлэеджакIохэм закъы­фагъэзагъ.
Бзэм идэхагъэ зэхябгъэшIэнымкIэ мыщ фэдэ Iофтхьабзэхэм яшIуагъэ къы­зэрыкIорэр кIэлэеджакIохэм кIэухым къыхагъэщыгъ. Ныдэлъфыбзэр шIу языгъэлъэгъурэ кIэлэегъаджэхэм зэрафэразэхэр къаIуагъ.
ДЕЛЭКЪО Анет.