Къихьащт 2026-рэ илъэс бюджетым ыкIи 2027 — 2028-кIэ агъэнэфагъэхэм афэгъэхьыгъэ хэбзэгъэуцугъэм ипроект апэрэ еджэгъумкIэ щаштагъ АР-м и Къэ­ралыгъо Совет — Ха-
сэм я L-рэ зэхэсыгъоу шэ­кIогъум и 20-м иIа­гъэм.

Iофтхьабзэм хэлэжьагъэх АР-м иминистрэхэм я Кабинет хэтхэр, федеральнэ ыкIи республикэ къулыкъухэм ялIыкIохэр, народнэ депутатхэм ясоветхэм япащэхэр, нэмыкIхэр. Зэхэсыгъор зэрищагъ Парламентым и Тхьаматэу Владимир Нарожнэм.
АР-м и ЛIышъхьэу КъумпIыл Мурат къыхилъхьэгъэ законопроектэу къихьащт илъэс бюджетым, ащ къы­кIэлъыкIорэ илъэситIумкIэ агъэнэфагъэхэм афэгъэхьыгъэм хэбзэгъэуцугъэм къыдыхэлъытэгъэ шэпхъэ пстэур къызэпичыгъ, Парламентым икомитетэу ащ фэгъэзагъэр хаплъи, дыригъэштагъ.
АР-м финансхэмкIэ иминистрэ игуадзэу Хьэпэе Ма­риет проектым нэIуасэ къыфишIыгъэх. Ащ къызэриIуагъэмкIэ, 2026-рэ илъэс бюджетым хахъохэмкIэ иIахьэ сомэ миллиард 44,9-рэ, хъар­джхэмкIэ сомэ мил­лиард 47,3-рэ зэрэхъущтхэр. Сомэ миллиарди 2,4-рэ щыкIагъэ фэхъущт.
Джащ фэдэу 2027-рэ илъэ­сым ибюджет пэшIорыгъэ­шъэу ихахъохэр сомэ миллиард 49,7-рэ, хъарджхэмкIэ иIахьэ сомэ миллиард 50,8-рэ хъущтых, сомэ миллиардрэ миллиони 100-рэ щыкIагъэ фэхъущт. 2028-мкIэ бюджетым хахъохэмкIэ иIахьэ сомэ миллиард 55,1-рэ, хъарджхэр сомэ миллиард 56,6-рэ хъущтых, щыкIагъэу сомэ миллиардрэ миллион 500-рэ фэхъущт.
Лъэпкъ проекти 10-мэ япхырыщын пае аштэгъэ шъолъыр проект 28-мэ къадэлъытагъэхэм ягъэцэкIэн сомэ миллиарди 8,2-рэ фагъэнэфагъ. Ана­хьыбэу, ар сомэ мил­лиарди 3,6-рэ мэхъу, «ЩыIэныгъэм пае ин­фраструктурэр» зыфиIорэр ары зыпэIухьащтыр. Ащ нэмыкIэу «Унагъом» сомэ миллиардрэ миллион 664-м ехъу, «ЗекIоныр ыкIи хьакIэ пэгъо­кIыныр» зыфиIорэм сомэ миллиардым ехъу, «НыбжьыкIэхэмрэ кIэлэцIы­кIухэмрэ» сомэ миллион 797,9-рэ, «ГъэшIэ кIыхьэр ыкIи чаныр» зыфиIорэм сомэ миллион 698,7-рэ, «IофышIэхэм» сомэ миллиони 154-рэ афагъэнэфагъ.
АР-м и Къэралыгъо Совет — Хасэм и Тхьаматэ игуадзэу Iащэ Му­хьамэд бюджет, финанс, хэбзэIахь ыкIи эконо­микэ политикэмкIэ, предпринимательствэмкIэ ыкIи IэкIыб зэпхыныгъэхэмкIэ АР-м и Парламент икомитетэу ежь зипащэр хэ­бзэгъэуцугъэм ипроект зэрэхэплъагъэр, зэрэдыригъэштагъэр, гъэтэрэзы­жьын фэшIыгъэн фаеу зыпари къызэрэхамылъхьагъэр къыIуагъ.
АР-м и УплъэкIокIо-­лъытэкIо палатэ ипащэу Павел Стаценкэр проектым зыхаплъэхэм зэ­фэхьысыжьэу ашIыгъэхэм къатегущыIэзэ къызэри­IуагъэмкIэ, ащ изэхэгъэуцонкIэ шапхъэхэр зэкIэ гъэцэкIагъэх.
Депутатхэр законопроектым зытегущыIэхэм ыуж, апэрэ еджэгъумкIэ аштагъ.
ШIокI зимыIэ медицинэ страхованиемкIэ АР-м и ЧIыпIэ фонд 2026-рэ илъэ­сымкIэ ибюджет ыкIи 2027 — 2028-мкIэ агъэнэфагъэ­хэм афэгъэхьыгъэ хэбзэгъэуцугъэм ипроекти мы зэхэсыгъом щытегущыIагъэх. Ащ нэIуасэ къыфи­шIыгъэх фондым ипащэ игуадзэу Джарымэ Сулиет. 2026-рэ илъэс бюджетым хахъохэмкIэ иIахьэ сомэ миллиарди 10,05-рэ хъущт, хъарджхэри ащ фэди­зыщтых, щыкIагъэ фэхъущтэп.
Мы проектыми гъэтэ­рэзыжьын иIагъэп. Депутатхэм апэрэ еджэгъумкIэ аштагъ.
АР-м ихэбзэгъэуцугъэу нэужым зэхэсыгъом ща­штагъэхэм ащыщых къэралыгъо мылъкур приватизацие шIыгъэным, организациехэм ямылъку пае къатырэ хэбзэIахьэу бюджетым къыхэлъхьагъэ хъу­рэм, зыныбжь имыкъу­гъэхэм яIофхэм ыкIи ахэм яфитыныгъэхэм якъэухъу­мэн афэгъэзэ­гъэщт комиссиехэм язэ­хэщэнкIэ чIыпIэ зыгъэIорышIэжьыпIэ къулыкъухэм пшъэрылъэу яIэхэм афэгъэхьыгъэ хэбзэгъэуцу­гъэхэм зэхъокIыныгъэхэр афэшIыгъэнхэм афэгъэ­хьыгъэ законопроектхэр, законхэр.
ХЪУТ Нэфсэт.