Адыгеим и ЛIышъхьэ пшъэрылъ къызэрафи­шIыгъэм тетэу Мые­къуапэ зекIохэм анаIэ нахь къытырадзэнымкIэ, республикэм къа­кIорэр нахьыбэ хъунымкIэ, къалэр нахь зэте­гъэпсыхьэгъэнымкIэ
IофшIэн гъэнэфагъэ щэкIо.

Анахьэу анаIэ зытырарагъадзэрэр общественнэ чIыпIэхэр, тарихъ мэхьанэ зиIэ унэхэр гъэкIэжьыгъэнхэр, гъэ­псэфыпIэ шъолъырыкIэхэр шIыгъэнхэр ары. А пшъэрылъхэм ягъэцэкIэн зэрэкIорэм ыкIи къапыщылъхэр зэшIо­хыгъэ зэрэхъущтхэм яIофыгъохэм щахэплъагъэх АР-м иминистрэхэм я Кабинет изэ­IукIэу республикэм и ЛIышъхьэу КъумпIыл Мурат зэрищагъэм. Фэтэрыбэу зэхэт унэхэм яигъэкIотыгъэ гъэцэ­кIэжьынкIэ пшъэрылъыкIэхэри агъэнэфагъэх.
АР-м псэолъэшIынымкIэ, транспортымкIэ, унэ-псэупIэ ыкIи гъогу хъызмэтымкIэ ими­нистрэ иапэрэ гуадзэу Лафышъэ Рэмэзан къызэри­IуагъэмкIэ, шъолъыр программэу гъэцэкIэжьын IофшIэнхэм афэгъэхьыгъэу щытым фэ­тэрыбэу зэхэт унэ 1652-рэ хагъэхьагъ. 2022-рэ илъэсым къыщыублагъэу ащ фэдэ унэ 509-рэ агъэцэкIэжьыгъ. На­хьыбэмкIэ мылъкур зыпэ­Iу­хьэрэр унашъхьэхэм яигъэ­кIотыгъэ гъэцэкIэжьынрэ лифтхэм язэблэхъунрэ.
АР-м и ЛIышъхьэ пшъэ­рылъ зэрафишIыгъэм тетэу анахьэу анаIэ зытырагъэтырэр къэлэ шъхьаIэм теплъэу иIэр ары, унэ гупэхэр, унашъхьэхэр, балконхэр агъэцэ­кIэжьхэ зыхъукIэ шъоу яIэщтымкIи зэдиштэхэу щы­тынхэ фае. Мы лъэхъаным пстэуми апэу зиунэ гупэхэр гъэцэ­кIэжьыгъэн фаехэм яспискэ зэхагъэуцо. ЧIыпIэ бюджетым икъэкIуапIэхэм къахагъэкIызэ 2025-рэ илъэсым фэтэры-
бэу зэхэт уни 6-мэ ягупэхэр агъэцэкIэжьыгъэх, ахэм ана­хьыбэр къэлэ гупчэм итых.
АР-м и ЛIышъхьэ анаIэ тыраригъэ­дзагъ аухэсыгъэ планым диштэу игъэ­кIотыгъэ гъэцэкIэжьынхэмкIэ пIалъэхэр укъуагъэ мыхъунхэм, къалэхэм язэтегъэпсыхьанкIэ шэпхъэ гъэнэфагъэу щыIэхэр амыу­къонхэм. Къалэм итеплъэ нахь дахэ хъуным, зекIохэм анаIэ нахь къытырадзэным телъы-­
тэгъэ IофшIэныр лъэкIуатэ. ГущыIэм пае, республикэм щы­псэухэрэм ялъэпкъ культурэ, ятарихъ, яшэн-хабзэхэр къыз­хэщырэ сурэтхэр унэ дэпкъхэм атырашIыхьэх.
«Мыекъуапэ республикэм игупчэу зэрэщытым инэшанэхэр нахь нэрылъэгъу зэрэхъущтхэмкIэ Iофтхьэбзэ гъэ­нэ­фагъэхэр зэшIотхынхэ, тарихъ унэхэр зыпкъ зэридгъэуцо­жьыхэрэм дакIоу джырэ уахътэм диштэрэ амал зэфэ­шъ­хьафхэри дгъэфедэнхэ фае.
А лъэныкъомкIэ бэ зэшIотхыгъэр. ЦIыфхэм ягуапэу зэра­гъэлъэгъух, къащакIухьэ агъэ­кIэжьыгъэ общественнэ чIыпIэхэм. Ягъэпсэфыгъо уахътэ нахь дэгъоу зэрэзэхащэщтым тыкъыпкъырыкIын, цIыфхэр жъугъэу зыхэлэжьэхэрэ Iоф­тхьабзэхэр зыщызэхащэнхэ алъэкIыщт чIыпIэхэр нахь игъэ­кIотыгъэу дгъэфедэнхэ фае. Мыекъуапэ тапэкIи изэтегъэ­псыхьан зэрэлъыдгъэкIотэщтым дакIоу архитектур­нэ пшъэрылъхэми нахь игъэкIотыгъэу тягупшысэн, къалэм нэмыкIхэм къахэзгъэщырэ теплъэ иIэ зэ­рэхъущтым тыдэлэжьэн фае. Джыри мэхьанэшхо зиIэ лъэныкъом игугъу къэсшIыщт — къэбзэныгъэм ишапхъэхэм ты­наIэ зэратедгъэтырэм дакIоу чъыгхэр, куандэхэр нахьыбэу тымыгъэтIысхьэхэ хъущтэп», — къыхигъэщыгъ КъумпIыл Мурат.
Къалэм изэтегъэпсыхьан иIо­фыгъохэм атегущыIэхэ зэ­хъум, республикэм ­ипащэ къыхигъэщыгъ хэбзэ къулыкъухэм ренэу анаIэ зытырагъэтыхэрэм псэупIэ пстэури зэтегъэпсыхьэгъэныр зэращыщыр. АР-м и ЛIышъхьэ къалэхэм ыкIи рай­он­хэм япащэхэм пшъэрылъ афишIыгъ муниципальнэ чIыпIэхэм ятеп­лъэ, ахэм чъыгхэмрэ куандэ­хэмрэ ащагъэтIысхьанхэм анаIэ нахь атырагъэтынэу. Къуаджэу БжыхьэкъоякIэм ихэхъоныгъэ Iофыгъо шъхьафэу къызщыуцугъэхэм ащыщыгъ. Къутырэу Чернышевым, псэупIэу Табач­нэм, станицэу Кужорскэм, къуа­джэу Наты­хъуае, псэупIэу Род­никовым ащы­псэу­хэрэм яIофыгъохэм язэшIохын дэ­лэжьагъ.
АР-м и ЛIышъхьэ ипресс-къулыкъу къытырэ къэбар­хэм­кIэ Тхьаркъохъо Сафыет.