Бжыхьэ дзэ дэщыгъом къыды­хэлъытагъэу, Адыгеим щыщхэу Урысыем и УIэшыгъэ КIуа­чIэхэм къулыкъур ащызы­хьыщт ныбжьыкIэхэр тыгъуа­сэ гъогу техьагъэх.

Нэбгыри 10 мэфэкI шIыкIэм тетэу агъэкIотагъэх. Ахэм ошъогу-десант дзэхэм яя 242-рэ еджэпIэ гупчэу Омскэ дэтым къулыкъур щахьыщт.
МэфэкI Iофтхьабзэу АР-м идзэ комиссариат щыкIуагъэм хэлэжьагъэх республикэм игъэцэкIэкIо хэбзэ къулыкъухэм, патриотическэ ыкIи общественнэ организациехэм ялIыкIохэр, дзэ къулыкъум иветеранхэр, ны-тыхэр.
АР-м идзэ комиссар шъхьаIэу А. Аве­риным къызэриIуагъэмкIэ, бжыхьэ дзэ дэщыгъор зэрифэшъуашэу республикэм щылъэкIуатэ. Ащ къыдыхэлъыта­гъэу, зичэзыу ныбжьыкIи 10 зэрагъэ­кIуатэхэрэр ыкIи мы къулыкъушIэхэр зэ­пэуцужьхэр зыщыкIорэ чIыпIэхэм зэрамыщэщтхэр ащ къыхигъэщыгъ.
Джащ фэдэу къэзэрэугъоигъэхэм за­къыфигъазэзэ, Къыблэ дзэ округым истратегическэ командование иинспектор куп хэтэу, генерал-майорэу Юрий Калягиным Хэгъэгум къулыкъу фэхьыгъэным игъогу ныбжьыкIэхэр зэрэтеуцуагъэхэр къыхигъэщыгъ.
— Непэ къэралыгъо пчъагъэхэр Урысыем къыпэуцугъэхэу ушэтыпIэм тызщит лъэхъаным пшъэрылъэу къэуцухэрэр къызэрыкIохэп. Шъо плъыр-стыр зыдэщыIэ чIыпIэхэм шъуащэщтэп, ау пшъэ­рылъэу къышъуфагъэуцухэрэр шIокI имыIэу жъугъэцэкIэнхэ фае. Тятэжъхэм, тидзэкIолIхэу хэушъхьафыкIыгъэ дзэ операцием хэлажьэхэрэм лIы­хъужъныгъэу, псэемыблэжьыныгъэу зэрахьэрэр щысэтехыпIэу шъуиIэнхэ фае. Дзэ къулыкъум хъулъфыгъэм ишэн-зекIуакIэхэр щыпсыхьагъэ мэхъу.Илъэсэу шъукъызэрэтыщтыр бэп, псын­кIэу кIощт. Сыд фэдэрэ лъэныкъо зы­жъугъэзагъэми, шъуипсауныгъэ зэщымыкъоу ны-тыхэм къафэжъугъэзэжьынхэу сышъуфэлъаIо, — хигъэунэфы-­
кIыгъ генерал-майорым.
Гъогу техьэрэ ныбжьыкIэхэр джы дзэ­кIолI зэрэхъугъэхэр къагурыIонымкIэ, пшъэ­рылъэу яIэхэр щытхъу хэлъэу агъэ­цэкIэнхэмкIэ зэращыгугъыхэрэр къа­Iуагъ Мыекъопэ къэлэ администрацием ипащэ игуадзэу Андрей Михайловым, АР-м заом ыкIи дзэ къулыкъум иве­теранхэм я Совет итхьаматэу, подполковникэу Анатолий Вербицкэм.
Ошъогу-десант дзэ частэу ныбжьыкIэхэр зыдащэщтхэм илIыкIоу Юрий Ахмедьяновыр къэгущыIагъ. Ащ къы­зэриIотагъэмкIэ, къулыкъушIэхэр апэ егъэджэн гупчэу Омскэ дэтым мэзитIо щыIэщтых, нэужым дзэ частьхэм ащэщтых.
Ны-тыхэм ацIэкIэ Елена Карнауховар къэгущыIагъ, къулыкъум ежьэгъэ ныбжьыкIэхэм псаухэу, узынчъэхэу къа­гъэ­зэжьынэу къафэлъэIуагъ.
Iэшъынэ Сусан.