Муниципальнэ коеу «Къа­лэу Мыекъуапэ» инароднэ депутатхэм я Совет иде­путатэу, муниципальнэ къулыкъум илIыкIохэм ате­гъэпсыхьэгъэ шIухьаф­тынэу «Служение» зы­фи­Iорэм икъыдэхын хэ­лажьэу Бэрзэдж Асиет зэдэгущыIэгъоу дыряIагъэм нэIуасэ шъуфэтэшIы.

— Асиет, уипроект фэгъэхьыгъэу къытфэпIуатэ тшIои­гъуагъ. Муниципалитетым ищыIакIэ сыд фэдэ зэхъокIыныгъа ащ фишIыгъэр?
— Проектэу «IэпэIэсабэ зэрыс ­Адыгеир» зыфиIоу згъэхьазырыгъэмкIэ «Служение» зыфиIорэ шIухьафтыным икъыдэхын сыхэлажьэ, лъэIу тхылъыр аIэкIэзгъэхьэгъах. Тиреспубликэ щы­псэухэрэм яшIоигъоныгъэхэм зызэращыдгъэгъозэщт, ахэм жабзэ къызэра­дэдгъотыщт шIыкIакIэхэр къызэрэхэтхыгъэхэм ар ишыхьат. Ар зытегъэпсы­хьагъэр лъэпкъ IэшIагъэхэм зягъэу­шъомбгъугъэныр, ахэм афэщагъэхэм IэпыIэгъу ягъэгъотыгъэныр ары.
Проектым тетэу зэрахьащт Iофтхьабзэхэм лъэпкъ IэшIагъэхэр къэзыгъэ­гъунэрэ, Iэпэщысэхэр зышIырэ пстэури къыхырагъэубытэнхэу, ахэм яIэпэIэсэныгъэрэ якъулаиныгъэрэ къызыщагъэлъэгъощт чIыпIэу хъунэу тыфэягъ. Ащ фэдэ гухэлъым сырыгъуазэзэ, къалэу Мыекъуапэ иадминистрацие зыфэзгъэзагъ, проектым иплан мыщ къыщызэдыхэтхыгъ.
Апэрэ хъугъэ-шIагъэр — «Лъэпкъ IэпэIасэхэм яермэлыкъ» зыфиIорэр гъэ­хъэгъэшхо хэлъэу 2013-рэ илъэсым кIуагъэ. Творческэ амалышхохэр зиIэ IэпэIасэхэмрэ хьакIэхэмрэ ащ жъугъэу хэлэжьэгъагъэх. ЦIыфхэм ашIогъэшIэгъон ар зэрэхъугъэр, IэпэIасэхэр ягуапэу зэрэхэлэжьагъэхэр нэрылъэгъу къызытфэхъум, ащ фэдэ Iофтхьабзэхэр лъыдгъэкIотэнэу итхъухьагъ. Ермэлы­къыкIэ зэхатщэ къэс ащ къекIуалIэхэрэм япчъагъэ хахъощтыгъ. ТIэкIу-тIэкIузэ къалэм икультурнэ щыIэныгъэ изы Iахьышхо ар хъугъэ.
IэпэIасэхэр зыхэмыт мэфэкIхэр Мые­къуапэ иурам шъхьаIэ непэ щызэхащэхэрэп. Ермэлыкъхэр «Мыекъуапэ и Арбат» фэдэу хъугъэх. Къэлэдэсхэм ямы­закъоу, хьакIэхэми тиIэпэIасэхэм яIэшIагъэхэр агъэлъапIэх.
Проектыр пхырытщызэ къыдгурыIуагъ культурнэ, творческэ амалхэр къызфэдгъэфедэхэмэ нахь псынкIэу ты­зэгурыIон зэрэтлъэкIыщтыр. Къалэм ищы­Iэныгъэ хэлэжьэным фэхьазыр цIыф сэнаущхэр бэу Мыекъуапэ зэрэдэсхэр проектым къыгъэлъэгъуагъ.
— Мафэ къэс Iофэу бгъэцакIэ­рэмкIэ «Iоф фэшIэныр» зыфи­Iорэ гущыIэ­хэм сыда о къарыбгъэкIырэр?
— Уипшъэрылъ огъэцэкIэ къодыекIэ икъунэу щытэп. Апэрэ чэзыоу уиму­ниципалитет, ащ щыпсэухэрэм яфедэхэм уафэлэжьэн, ахэм уадеIэным, уп­чIэжьэгъу уафэхъуным сыдигъуи уфэ­хьазырын, мафэ къэс Iофэу пшIэрэмкIэ цIыфхэм зэрагъэуIугъэ шIуагъэхэм уиIахь ахэпшIыхьан фае.
Сикъэлэ гупсэ нахь фэшIыгъэ хъунымкIэ сфэлъэкIырэр зэкIэ сшIэнэу сыпылъ. Ар сипшъэрылъ къодыеу слъы­тэрэп, сигухэлъхэм ягъэцэкIэн сыте­зыгъэгушхорэ амалэуи щыт. ЦIыфхэм яфедэ сызэрэфэлажьэрэм дакIоу кIэ горэхэми ренэу зафэзгъэсэн, сыздэлэжьэжьын фаеу мэхъу.
— О пшъхьэкIи, муниципальнэ IофхэмкIи шIухьафтыным мэхьанэу иIэм укъытегущыIэ тшIоигъуагъ.
— ШIухьафтыным икъыдэхын хэла­жьэрэм къыгурэIо зэшIуихырэм мэхьа­нэшхо зэриIэр ыкIи ар ящыкIагъэу зэрэщытыр. ЫпэкIэ улъыкIотэным, гу­пшысакIэхэр пхырыпщынхэм, укъызэ­темыуцоным ащ уатырегъэгушхо. Мыр зыфагъэшъуашэхэрэр муниципальнэ къулыкъушIэхэр ары.
IофшIэным еплъыкIэ-екIолIакIэу фыряIэр зэблэхъугъэным шIухьафтыныр фэлажьэ. Хабзэмрэ обществэмрэ яцы­хьэзэфэшIыжьыныгъэ ащ нахь егъэпытэ, IофшIэкIэ амалэу аIэкIэлъхэмкIэ зэ­хъожьынхэм фэIорышIэ. Лауреатхэм яIофшIагъэхэм гушхоныгъэ къыпхалъхьэ.
— Мы аужырэ илъэсхэм сыд фэдэ зэхъокIыныгъа муниципальнэ гъэIорышIэным фэ­хъугъэр?
— ЗэхъокIыныгъэ шъхьаIэу ащ фэ­хъугъэр цIыфхэм яIофыгъохэм язэшIохын нахь зызэрэфигъэзагъэр ары. ЦIыф­хэм яфэныкъоныгъэхэм ягъэцэкIэн, унашъохэм яштэн ахэр къыхэлэжьэнхэм нахь лъэшэу гъунэ алъафы хъугъэ. НепэкIэ лъэшэу анаIэ зытырагъэтырэр нэфэIоныр ылъапсэу, шъхьэихыгъэу Iофхэр зэхэщэгъэнхэр ары. Цифрэ фэIо-фашIэхэм зызэрарагъэушъомбгъурэр, цIыфхэм яеплъыкIэхэм язэгъэшIэнкIэ социальнэ хъытыухэр жъугъэу зэра­гъэфедэхэрэр тинэрылъэгъу. ЫпэкIэ Iэшъхьэтетхэм унашъохэр зэраштэщтыгъэм фэмыдэжьэу «хэкIыпIэ нахьышIум тызэдежъугъэус» аIо. Ащ лъэшэу те­гъэгушIо, сыда пIомэ цIыф жъугъэхэм ягъэIорышIэн ащ тетэу ары гъэпсыгъэн зэрэфаер.
— Асиет, чIыпIэ зыгъэIоры­шIэжьыным хэхъоныгъэ егъэшIыгъэнымкIэ Урысые ассо­циациемрэ (ВАРМСУ) ащ ­ипрограммэхэмрэ мэхьанэу ­мыщкIэ яIэм укъытегущыIэ тшIоигъуагъ.
— ШIухьафтынэу «Служение» зыфиIорэм игъэнэфэн кIэщакIо фэхъугъэр ВАРМСУ-р ары. Тихэгъэгу имуниципальнэ сообществэхэр ащ зэкъуи­гъэуцуагъэх. Ащ ишIуагъэкIэ непэ муниципальнэ хабзэм илIыкIохэм нэры­лъэгъу къафэхъугъ чIыпIэ зыгъэIоры­шIэжьыным иIофыгъохэм агъэгумэкIы-
рэ организацие зэрэщыIэр. Урысыем и Президентэу Владимир Путиным пшъэ­рылъ зэрафишIыгъэм тетэу шIухьафтынэу «Служение» зэрафагъэшъуашэрэр ащкIэ щысэшIоу щыт. Муниципальнэ сообществэм IэпыIэгъу егъэгъотыгъэнымкIэ ыкIи зегъэушъомбгъугъэнымкIэ Iофышхо зэрашIагъэр ащ къеу­шы­хьаты. IофшIэным зэрэтыригъэгушхо­хэрэм имызакъоу, нахьыбэу шIуагъэ къэзытыщт проект­хэми, лъэныкъохэми анаIэ ащ нахь атырарегъадзэ.
Шъолъыр гъэIорышIэнымкIэ
Гупчэр