Рэмэзанэрэ сэррэ илъэс пшIыкIутфым къыщымыкIэу тызэдэлэжьагъэшъ, ицIыфыгъэрэ ишэн гъэтIылъыгъэрэкIэ сэшIэ. IофшIэным епхыгъэу упчIэ горэ сиIэ хъумэ зыфэзгъазэщтыгъ, къэпIон хъумэ, шъхьэкIэфэныгъэ зэфэтшIэу тызэдэлэжьагъ.

А уахътэм гъэзетым иредактор шъхьа­Iэу сыщытыгъ. КIэтхэгъур къызысырэм, Къэзэнэ Юсыфрэ сэррэ Рэмазан дэжь тымыкIоу къыхэкIыщтыгъэп, ар тигъусэу Теуцожь районымрэ Адыгэкъалэрэ къызэпэткIухьанхэр тишэныгъ, чIыпIэ администрациехэм ыкIи организациехэм тачIахьэщтыгъ. Тыдэ тымыкIуагъэми, Нэхэе Рэмэзанэ тигъусэ хъумэ, ягопэшхоу зэкIэхэри къытпэгъокIыщтыгъэх, ренэу къыхагъэщыщтыгъ ащ ихьатыркIэ гъэзетым зэрэкIатхэхэрэр, ыпэрэ тиражым къызэрэщамыгъэкIэщтыр. КIэтхэнымкIэ Рэмэзан ишIогъэшхо гъэ къэс къытигъэкIыщтыгъ.
Теуцожь районым ыкIи Адыгэкъалэ ащыпсэурэ цIыфхэу зиIофшIэнкIэ къахэщыгъэхэу Рэмэзан статья къызфимытхыгъэ, зигугъу дахэкIэ ымышIыгъэ ащыбгъотынэп. IэпэIэсэныгъэшхо хэлъэу республикэ гъэзетэу «Адыгэ макъэм» илъэсипшI пчъагъэрэ Iоф щишIагъ, щытхъур къылэжьыгъ, зымышIэрэ ыкIи зымылъытэрэ щыIэп къысшIошIы. Джары Теуцожь районым ицIыф гъэшIуагъэ зыкIэхъугъэр, «Адыгеим и Щытхъузехь» зыфиIорэ тын анахь лъапIэр къызкIыфагъэшъошагъэр. Сэри ащ сырэгушхо, сэгъэлъапIэ, тикъоджэ гупсэу Джэджэхьаблэ апэрэмкIэ Рэмэзанэ щыщ, ащ ыуж, дэгъоу тызэгурыIоу илъэс пчъагъэхэм Iоф зэдэтшIагъ, сятэ иныбджэгъушIугъ.
Илъэс заулэкIэ узэкIэIэбэжьмэ, Рэмэзан зигъэпсэфынэу тIысыжьыгъ, ау, ащ пае къэмынэу тызэкIэупчIэ, телефонымкIэ тызэфытеожьы, тызэдэгущыIэ.
ЗэлъашIэрэ адыгэ журналистэу Нэхэе Рэмэзан имэфэкI мэфэшхомкIэ сыгу къыздеIэу сыфэгушIо, псауныгъэ пытэ иIэу, ыгукIэ рэхьатэу джыри илъэсыбэрэ дунаим тетынэу сыфэлъаIо!
Дэрбэ Тимур.