Арэущтэу аIо адыгэхэм ар, лъытэныгъэр, къэлэжьыгъуаеу зэрэщытыр агъэунэфыгъэу.

Ары, IэшIэхэп ар къыб­дэхъуныр. ЦIыфхэм мафэ къэс уахэт зыхъукIэ, бэ узэрихьылIэщтыр, чIыпIэу узэрыфэн ылъэкIыщтыри джащ фэд. Ары къэс уицIыфыгъэ, уиадыгагъэ пстэуми ап­шъэн зэрэфаер зыщимыгъэгъупшэныр бэп къызыдэхъурэр, сыда пIомэ ащ ылъапсэх Iэдэбри, щэIагъэу пхэлъыри, пIуныгъэу уиIэри. Ахэр зэкIэ зэплъэгъулIэн плъэ­кIыщт цIыфэу ары зэрэтшIэрэр илъэсипшI пчъагъэхэм «Адыгэ макъэм» Теуцожь районымкIэ исобкорэу къыддэлэжьэгъэ Нэхэе Рэмэзан.
Редакцием къыIумыхьэзэ IэнэтIэ зэфэшъхьафхэм аIутыгъэ лIэу щыIэныгъэр дэгъоу зышIэщтыгъэм иIофшIэн фыщытыкIэу фыриIагъэр умыгъэшIэгъон плъэкIыщтыгъэп. Районэу зыщыпсэурэм щыхъурэ-щышIэрэмэ афэгъэхьыгъэу къытхыхэрэм нафэ къашIыщтыгъ зыфэгъэзэгъэ Iофыр ыкIэм нигъэсэу, ипшъэ­рылъ шэпхъэшIухэм атетэу зэшIуихыныр зэришэныр. ЩыIэныгъэм илъэныкъо пстэуми — мэкъу-мэщым, унэгъо пытэхэм, культурэм, гъэсэныгъэм — ащ итхыгъэхэр афэгъэхьыгъэщтыгъэх. Щытхъум имызакъоу, щыкIагъэу ылъэгъухэ­рэми ар ябгъукIощтыгъэп, шъхьэихы­гъэу ахэм ягугъу къышIыщтыгъ, район пащэхэми ашIэщтыгъ зэримыгъэгупсэфыщтхэр. ЦIыф къызэрыкIохэм фэлъэкIырэмкIэ ишIуагъэ аригъэкIыныр ипшъэ­рылъэу ылъытэщтыгъ. А зэкIэми къа­кIэкIуагъ лъытэныгъэу, шъхьэкIэфэныгъэу къыфашIыщтыгъэр.
«Нэхаим къыгъэхьыгъ» аIозэ мафэ къэс пIоми хъунэу Рэмэзан зичэзыу итхыгъэ редакцием къыIукIэу, ар хэутыным фэзыгъэхьазырыщтым раты зыхъукIэ, «Арэп, мы лIым сыдигъуа зызигъэпсэфырэр?» тIоу къыхэкIыщтыгъ. ДгъэшIагъощтыгъ зы мафэм чIыпIэ зэфэшъхьафхэм ащыIэнышъ, зыфэкIуагъэр зэхифынышъ, ятIонэрэ мафэм тхыгъэ нэкIубгъо зытIу хъущтыр къыгъэ­хьын зэрилъэкIыщтыгъэр. «Мэкъу-мэщым епхыгъэ пчъагъэхэр мафэ къэс зэблэхъу­гъэ мэхъух, ахэр щыбгъэлъхэ хъущтэп», — ыIощтыгъ. Редакторхэм пшъэрылъ фашIыгъэу «игъо сифэщтэп», «сыкIошъу­щтэп» ыIоу къыхэкIыгъэп, ежь имашинэкIэ зэкIэ къыкIухьэщтыгъ, материалыр псынкIэу къыхэутыгъэн фаемэ, ежь-ежьырэу редакцием къыщэу хъущтыгъ.
«Адыгэ макъэм» Рэмэзан щэлэжьэфэ къытхыгъэр, къыхаутыгъэр зэбгъэуIужьмэ, тхылъ пчъагъэ хъущт. Исэнэхьат фэшъыпкъэу, цIыфхэр ыгъэлъапIэхэу хьалэлэу илъэпкъ Рэмэзан фэлэжьагъ, иIофшIакIэ ифэшъошэ уаси къэралыгъом къыфишIыгъ.
Рэмэзан ныбджэгъубэ иIагъ ыкIи иI. ЦIыфым уасэ фишIын, ылъытэн, шIоу ащ хэлъыр пстэуми акIыIу ышIын зэрилъэкIырэр ащ ылъэпсэн фае. Сщыгъуп­шэжьырэп, редакцием ар щымылэжьэ­жьэу, имэфэкI мафэ ехъулIэу ащ фэгъэ­хьыгъэ тхыгъэ тигъэзет къызитэгъахьэм, Адыгэкъалэ щыщ лIы горэ, непэ ар Мыекъуапэ къащэжьыгъэу щэлажьэ, ежь тыфэтхагъэмэ зэригопэщтгъагъэм нахь лъэшэу Iоф къыддэзымышIэжьырэ нахьыжъыр зэрэтщымыгъупшагъэмкIэ къызэрэтфэразэр къызэрэтиIогъагъэр. Ари Рэмэзан лъытэныгъэу цIыфхэм фашIырэм изы шыхьат.
Журналистым жанрэ зэфэшъхьафхэр ыгъэфедэнхэ ылъэкIын фае. Ари Рэмэзан къыдэхъугъ. Апшъэрэ шIэныгъэу мэкъумэщ институтым щызэригъэгъотыгъэр римыгъэкъоу, аспирантурэри къыухыгъ, бэмэ ар ашIэщтыгъэп, зыщытхъу­жьыщтыгъэп, ау шIэныгъэм уасэ фэзышIырэ цIыфэу зэрэщытыр къыхэщыщтыгъ.
Илъэс зэкIэлъыкIохэм Рэмэзан Iоф ымышIэжьырэми, лъэпкъ гъэзетым ащ щыдэлэжьэнэу хъугъэхэм бэрэ тыгу къэкIыжьы, игугъу тэшIы, тщыгъупшэрэп.
Рэмэзан имэфэкI дахэ непэ хегъэу­нэфыкIышъ, тыгу къыддеIэу тыфэгушIо, имафи, ичэщи гупсэфынхэу, гушIуагъо къыфахьынэу, шIу ылъэгъоу иIэхэм яхъяр ылъэгъоу бэрэ ашъхьагъ итынэу тыфэлъаIо.
Опсэу, Рэмэзан!
ЖакIэмыкъо Аминэт.