Адыгеим икIыгъэ гуфэкIо нэбгырэ 45-у подразделениеу «Барсым» хэтхэу хэушъхьафыкIыгъэ дзэ операцием хэлажьэхэрэм апае АР-м идзэ комиссариат ыгъэхьазырыгъэ шIушIэ IэпыIэгъур афатIупщыгъ.

— Къыблэ дзэ округым икомандующэ ыкIи Адыгеим и ЛIышъхьэ яунашъокIэ ИлъэсыкIэ ыкIи Рождественскэ шIухьафтынэу мы IэпыIэгъур афетщэжьагъ. Ащ иугъоин цIыфыбэ къыхэлэжьагъ: муниципальнэ образованиехэр, къоджэ псэупIэхэр, еджапIэхэр, унэе предпринимательхэр, ыгукIэ шIу зышIэ зышIоигъо­хэр. ПстэумкIи къэмлэнэ 60-м ехъу къаугъоигъ, ар килограмм 700-м кIэхьэ. Мыщ хэхьагъэх гъомылапхъэхэр, зыухъу­мэхэрэ хъытыухэр, кIэлэцIыкIухэм атхыгъэ письмэхэр, — къыIуагъ респуб­ликэ дзэ комиссариатым цIыфхэм Iоф адэшIэгъэнымкIэ иотделение ипащэу Игорь Козел.
ТигущыIэгъу къызэрэтиIуагъэмкIэ, дзэкIолIхэм мэфэкI шIухьафтын афэ­хъущт IэпыIэгъур зыщаугъоирэ дзэ частым апэ ар ращэлIэщт. Ащ иIофышIэхэм гуфэкIо дзэкъулыкъушIэхэр фронтым ичIыпIэу зыдэщыIэхэр дэгъоу ашIэшъ, афащэ­жьыщт.
— ДзэкъулыкъушIэхэм агу къыдэщэегъэным, тынаIэ зэратетыр зэхашIэным мэхьанэ иI. Зыщыщхэ чIыпIэм къикIырэ анахь къэбар цIыкIуми ахэр щэгушIукIых. КIэлэцIыкIу письмэхэм узяджэкIэ, нэп­сыр къыпшIокIо. ГуфэкIо дзэкIолIхэм афэгумэкIхэзэ илъэсыкIэ шIухьафтын афэхъущт IэпыIэгъур къызэраугъоигъэр ахэм тызэракъотым ишыхьат, — хигъэу­нэфыкIыгъ Игорь Козел.
Iэшъынэ Сусан.