Къуаджэу Еджэркъуае лIэкъо парк щашIы. АщкIэ IофшIэнхэм яIахьышIу гъэцэкIэгъах. Гектарныкъо фэдиз хъурэ чIыналъэм лъэсрыкIуапIэхэр щагъэчъыгъэх, пхъэнтIэкIухэр щагъэуцугъэх, непэ-неущэу нэфынэ ращэлIэщт, остыгъэхэр агъэуцущтых.

— ПстэумкIи сомэ миллионитIурэ ныкъорэ фэдиз лIэкъо паркым ишIын пэIухьащт. Сомэ миллионитIур респуб­ликэ бюджетым къытIупщыгъ. Сомэ мин 200-р къоджэдэсхэм къаугъоигъ. Джащ фэдиз сатыушIхэм къызхахыгъ. Сомэ мин 300-р чIыпIэ зыгъэIорышIэжьыпIэм къыхигъэхъуагъ, — къыIуагъ Еджэр­къое къоджэ псэупIэм ипащэу Брафт Рус­лъан.
ПсэолъэшIын IофшIэнхэр мы илъэсым ыкIэ нэс къаухыщтых. Чъыгхэм ягъэтIысхьан гъатхэм рагъэжьэщт. ДжырэкIэ чъыг лъэпкъэу къыхахыщтым егупшысэх. Къоджэ псэупIэм ипащэ къызэриIуагъэм­кIэ, зыкIэхъопсыхэрэр адыгэ къужъ чъыгхэр ары, ау ахэм язэгъэгъотын IэшIэхэп. Къадэхъущта, къадэмыхъущта? Ар мыхъумэ ланчъэм, чъыгаем ахэплъы­хьащтых. ПстэумкIи чъыгишъэ фэдиз чIыналъэм щагъэтIысхьащт, къуаджэм илIакъо пэпчъ, непэ дэмысыжьхэри ахэтхэу.
— Къоджэдэсхэр лIэкъо паркэу тшIырэм фэчэф дэдэх. Шъхьадж амал зэриIэкIэ ишIуагъэ къытегъэкIы. ЦIыфхэр якъарыукIи IофшIэнхэм ахэлажьэх. Ащ мэхьанэшхорэ кIочIэшхорэ хэлъ. Тичылэ Мэрытыкъо Мухьарбый асфальтыр иахъщэкIэ тыраригъэлъхьагъ. Джащ фэд, Мамырыкъо Махьмуд техникэмкIэ IэпыIэгъу хъугъэ. Дэгужъые Адам нэфынэ зэхэщыпIэу IудгъэкIотын фэягъэр, къэ­Iогъу тыримыгъафэу, Iофэу ышIэрэр арыти, ыгъэкощыгъ. Арышъ, зэрэчылэу Тхьэм егъэпсэух, — тыщигъэгъозагъ Руслъан.
Шъугу къэдгъэкIыжьын, республикэ программэу «Инициативное бюджетирование» зыфиIорэм Еджэркъое къоджэ псэупIэр зыхэлажьэрэр илъэс заулэ хъугъэ. Непэ агъэпсырэ лIэкъо паркым къыгот зыгъэпсэфыпIэри ары зэрашIыгъагъэр. Мыгъэрэ хэлэжьэгъум ишIуагъэкIэ а шъолъырыр зэрэщытэу джы зэтегъэпсыхьагъ. Зэгорэм колхоз чIыгущтыгъэу амыгъэфедэжьыщтыгъэр къо­джэдэсхэр зэзыщэлIэрэ чIыпIэшIу хъугъэ. Къоджэ псэупIэм ипащэ къызэриIуа­гъэмкIэ, къэкIорэ илъэсми программэм хэлэжьэщтых.
Анцокъо Ирин.