Адыгэ къэралыгъо университетым гуманитар шIэныгъэхэмкIэ ыкIи культурэмкIэ и Институт IэкIыб къэралыгъуабзэхэмкIэ ифакультет инджылызыбзэмрэ арапыбзэмрэ зыщызэрагъашIэрэ отделением истудентхэр Урысые зэнэкъокъоу «Мультикультурный диалог: Россия – страны Арабского мира» зыфиIорэм хэлэжьагъэх ыкIи зэрифэшъуашэу зыкъыщагъэлъэгъуагъ.

АрапыбзэмкIэ кафедрэм икIэлэегъаджэу Къодз Зу­риет къызэрэтиIуагъэмкIэ, зэнэкъокъум игъэкIоты­гъэу зыфагъэхьазырыгъ. Заочнэ шIыкIэм тетэу кIогъэ уцугъом текIоныгъэ къыщыдахыгъ, видеотехыгъэу агъэхьазырыгъэр анахь дэгъухэм ащыщ хъугъэ. БэмышIэу аужырэ едзыгъом хэлэжьагъэх. Ащ зэрифэшъуашэу зыкъыщагъэлъэгъуагъ. БзэмкIэ шIэныгъэу аIэкIэлъымкIэ заушэтыгъ Анжела Касумовам, Дарья Фомичевам, Дарина Аслановам ыкIи Светлана Решетниковам. Чэчэн къэралыгъо кIэлэегъэджэ университетыр Iофтхьабзэм кIэщакIо фэхъугъ, кIэух уцугъор Грознэм щыкIуагъ.
Зэнэкъокъум иаужырэ уцугъо Москва, Чэчэн Рес­публикэм, Адыгеим, Дагъыстан, Ростов хэкум ыкIи Луганскэ Народнэ Республикэм ялIыкIохэр хэлэжьагъэх. Ащ пшъэрылъ шъхьаIэу иIагъэр арапыбзэр зэзыгъэшIэрэ ныбжьыкIэхэм япчъагъэ нахьыбэ шIыгъэ­ныр, сэнаущыгъэу ахэлъым хэгъэхъогъэныр, араб хэгъэгухэм зэпхыныгъэ адыряIэныр ары.
— Зэнэкъокъум типшъашъэхэм шIэныгъэ дэгъухэр къыщагъэлъэгъуагъэх. Мыщ мыгъэ апэрэу тыхэлэ­жьагъ, къэкIорэ илъэсми зыщытыушэтынэу мурад тшIыгъэ.
ДЕЛЭКЪО Анет.