Мыекъопэ къэралыгъо технологическэ университетым идизайнер ныбжьыкIэ мы мафэхэм Санкт— Петербург щыкIогъэ Дунэе зэнэкъо­къоу «Поколение NEXT» зыфи­Iорэм текIоныгъэ къыщыдихыгъ.

Мыекъопэ къэралыгъо технологическэ университетым иэкспериментальнэ ушэтыпIэ лабораторие проектэу «Графический дизайн» зыфиIорэр къыгъэлъэгъуагъ. Апэрэ курсым щеджэрэ студенткэу Агъыржьанэкъо Камиллэ щыгъынхэмкIэ дизайнерэу Анна Горковенкэр игъусэу фешенбук брендэу «Горько» зыцIэр агъэуцугъ. Творческэ проектыр зэдэлэжьэныгъэм изэфэхьысы­жьэу хъугъэ, «ДушуГрея» зыфиIорэм ар къыпкъырыкIыгъ.
Форумым ипрограммэ хэлэжьагъ апшъэ­рэ еджапIэм икафедрэ идоцентэу КIэдэкIое Нэфсэт. Iэнэ хъураеу «Этно — место встречи вузов и бизнеса» зыфиIорэм ар къыщыгущыIагъ. Университетым зэхищэрэ проектхэр къафиIотагъэх. Урысыем щыпсэурэ лъэпкъ зэфэшъхьафхэм якультурэ ыкIи этностилистикэр къызфагъэфедэзэ IофшIэгъэ гъэшIэгъонхэр къызэрадэхъухэрэр къа­фиIотагъ.
Къагъэлъэгъогъэ фешенбукым урыс шапхъэм илъ иллюстрацие заулэ хэхьэ, ахэр лъэпкъ нэшанэхэмкIэ ыкIи непэрэ дизайнерскэ шIыкIэхэмкIэ гъэкIэрэкIагъэх. Камиллэ иIофшIагъэ зэнэкъокъум иосэшIхэм къыхагъэщыгъ ыкIи апэрэ шъуашэ зиIэ Дипломыр къыфагъэшъошагъ.
Мыекъопэ къэралыгъо технологическэ университетым ипресс-къулыкъу.