Адыгэ Республикэр къэзыгъэлъэгъорэ командэу «Урожаир» (псэупIэу Тульскэр) футболымкIэ Къыблэ ыкIи Темыр-Кавказ федеральнэ шъолъырхэм ячемпионхэм ялигэ ифиналныкъо ихьагъ.

БлэкIыгъэ зыгъэпсэфыгъо мафэхэм «Урожаир» Къалмыкъым икомандэу «Тюльпан» зыфиIорэм дешIагъ ыкIи 6:0-у текIоныгъэр къыдихыгъ. Александр Красновым, Артем Мельник ыкIи Антон Захаровым тIогъогогъу зырызэ къэлапчъэм Iэгуаор дадзагъ.
Финалныкъом къыдыхэлъытагъэу шэкIогъум и 23-м «Урожаир» Краснодар краим истаницэу Павловскэр къэзыгъэлъэгъорэ «Кубань-Холдинг-2» зыфиIорэм дешIэщт. Мыщ текIоныгъэ къыщыдэзыхырэм Къыблэ федеральнэ шъолъырым изэнэкъокъу апэрэ чIыпIэр щиубытыщт ыкIи суперфиналым Темыр-Кавказ федеральнэ шъолъы­рым ичемпион дешIэнэу фитыныгъэ къыдихыщт.