Теннис цIыкIумкIэ Iофтхьабзэу «Урысыем инеущрэ маф» зыфиIорэр къалэу Славянск-на-Кубани щыкIуагъ. Къыблэ федеральнэ шъолъырым ит спорт еджапIэхэм ыкIи организациехэм азыфагу щызэхащэгъэ зэнэкъокъум зыныбжь илъэс 14-м емыхъугъэ спортсменхэм зыщаушэтыгъ.

Мыекъопэ спорт еджапIэу С.М. Джэнчатэм ыцIэ зыхьырэм зыщызыгъэсэхэрэ Артем Вариводиным, Бзаго Дамир, Кирилл Панькиным, Владимир Скоблевым Адыгеир къагъэлъэгъуагъ. ТикIа­лэхэр еджэпIэ ыкIи организации 9-мэ ялIыкIохэм янэкъокъугъэх. Краснодар краим ыкIи Ростов хэкум якомандэ щырыщ, джащ фэдэу Астраханскэ хэкум, Респуб­ликэу Къырым ыкIи Севастополь якомандэ зырыз Iофтхьабзэм хэлэжьагъэх. Ахэм ешIэгъу бгъу­рыбгъу яIагъ.
Мыекъуапэ итеннисистхэр Славянск-на-Кубани, Батайскэ, псэупIэу Целинам яспортсменхэм 3:2-у атекIуагъэх. Зэнэкъокъум иаужырэ мафэ тикомандэ Астраханскэ хэкум 3:0-у къышIуихьыгъ ыкIи ятфэнэрэ чIыпIэр къыхьыгъ. Олимпийскэ ухьазырыныгъэм игупчэу Краснодар дэтым икомандэ текIоныгъэр фагъэшъо­шагъ, зэнэкъокъум иаужырэ едзыгъоу тыгъэгъазэм ыкIэм къалэу Шъачэ щыкIощтым Къыблэ федеральнэ шъолъырыр къыщигъэлъэгъонэу ащ фитыныгъэ къыдихыгъ.