Администрациехэм цIыфэу закъыфэзгъазэхэрэм Iоф зэрадашIэщтым фэгъэхьыгъэ семинар Адыгэ Республикэм имуниципальнэ образованиехэм я Совет и Ассоциацие иIагъ.

Iофтхьабзэм изэхэщэн хэлэжьагъэх АР-м чIыпIэ зыгъэIорышIэжьыпIэхэм адыряIэ зэпхыныгъэхэмкIэ и Комитет, пшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «ПравэхэмкIэ къэбар агентствэу «Гарантыр», къэ­­ралыгъо ыкIи муниципальнэ къулыкъу­шIэхэм ясэнэхьат хэшIыкIэу фыряIэм зегъэушъомбгъугъэнымкIэ Гупчэр. Семинарыр Мыекъопэ къэралыгъо технологическэ университетым щыкIуагъ.
Ащ къырагъэблэгъагъэх район, къэлэ ыкIи псэупIэ кой администрациехэм ялIыкIохэр, народнэ депутатхэм я Советхэм ахэтхэр. Iофтхьабзэм икъызэ­Iухын хэлэжьагъэх АР-м и ЛIышъхьэ ыкIи министрэхэм я Кабинет я Администрацие ипащэу Владимир Свеженец, АР-м чIыпIэ зыгъэIорышIэжьыпIэхэм адыряIэ зэпхыныгъэхэмкIэ и Комитет ипащэу КIэдэкIой Руслъан, Ассоциацием иправление итхьаматэу Апсэлямэ Руслъан, къэралыгъо ыкIи муниципальнэ къулыкъушIэхэм ясэнэхьат хэшIыкIэу фыряIэм зегъэушъомбгъугъэнымкIэ Гупчэм ипащэу, Мыекъопэ къэралыгъо технологическэ университетым идеканэу Пэфэ Фатимэ.
АР-м и ЛIышъхьэу КъумпIыл Мурат ыцIэкIэ семинарым къекIо­лIа­гъэхэм шIуфэс къарихыгъ Владимир Свеженец. Темэ шъхьаIэу къыхахыгъэр непэ зигъо Iофэу зэрэщытыр ащ къыхигъэщыгъ, шIуагъэ къытэу яIофшIэн зэхэщагъэ хъунэу къафэлъэIуагъ.

— ЦIыфэу республикэм исхэм апай къулыкъу зыфэтхьырэр, арышъ, ахэм яIофыгъохэр дэгъэзыжьыгъэнхэр, ящыIакIэ нахьышIу шIыгъэныр анахь шъхьаIэхэм ащыщын фае. Тхьаусыхэ тхылъэу къышъуахьылIэхэрэм язакъоп, сыд фэдэрэ Iофэу зыкъызэрэшъуфа­гъазэрэмкIи IэпыIэгъу шъуафэхъуныр шIокI зимыIэ Iофэу щыт. Ащ сыдигъокIи АР-м и ЛIышъхьэ тынаIэ тырыте­гъадзэ, — къыIуагъ ащ. — Джащ фэдэу хэушъхьафыкIыгъэ дзэ операцием хэлажьэхэрэмрэ ахэм яунагъохэмрэ ана­хьэу шъунаIэ атежъугъэтыныр зыщышъумыгъэгъупш. Ари апшъэ щытыщтхэм ащыщын фае.
Апсэлямэ Руслъан гущыIэр зештэм къызэриIуагъэмкIэ, муниципальнэ образованиехэм, псэупIэ койхэм яадминист­рациехэм япащэхэр, яIофышIэхэр зигъо Iофхэм зыщатегущыIэщтхэ, яIэпэIэсэныгъэкIэ, яшIэныгъэхэмкIэ зыщызэдэгощэщтхэ Iофтхьабзэхэр зэхэщэгъэнхэм АР-м и ЛIышъхьэ кIэщакIо фэхъугъ. Апэрэп мыщ фэдэ семинар зэрэзэхащэрэр, нэмыкI лъэныкъохэм афэгъэхьыгъэхэу нахьыпэкIи яIагъэх.
Семинарым нэбгырэ 50-м ехъу къе­кIолIэгъагъ. ЦIыфэу закъыфэзгъа­зэхэрэм яIофхэм зэрадэлэжьэщтхэм имызакъоу, администрациехэм ащылажьэхэрэр япшъэрылъхэр нахь чанэу агъэцэкIэнхэм фэгъэчэфыгъэнхэм фэшI анаIэ зытырагъэтын фаехэми атегущы­Iагъэх.
Iофтхьабзэм къыдыхэлъытагъэу псэупIэ кой администрацием ипэщэ IэнатIэ анахьыбэ хъугъэу Iутхэр яIофшIапIэкIэ къадэгощагъэх, «ПравэхэмкIэ къэбар агентствэу «Гарантым» илIыкIохэр лекциехэм къяджагъэх.
ХЪУТ Нэфсэт.