Медалибгъу къафагъэшъошагъ
СамбэмкIэ дунаим гъогогъу 11-рэ ичемпионэу, спортымкIэ заслуженнэ мастерэу Хьасанэкъо Мурат ишIухьафтынхэр зэрылъ я IX-рэ Урысые зэнэкъокъухэм Адыгеим илIыкIохэм медалибгъу къащахьыгъ. Мыщ ныбжьыкIэхэр ары хэлэжьагъэхэр.
Турнирым къэралыгъом ишъолъыри 10-мэ къарыкIыгъэ спортсмен 250-мэ зыщаушэтыгъ. Ахэм илъэс 15-м къыщегъэжьагъэу 17-м нэс аныбжь. Тынэу къафагъэшъошэщтхэм адакIоу, бэнакIохэм ахъщэ шIухьафтынхэр къахьынхэ ыкIи самбэмкIэ Урысыем ипервенствэ икIэух едзыгъо хэлэжьэнхэ фитыныгъэ къыдахын амал яIагъ. А пшъэрылъыр дэгъоу ыгъэцэкIагъ бэнэнымкIэ Пэнэжьыкъое еджапIэр къэзыгъэлъэгъогъэ Цундышкэ Ислъам. Килограмм 64-м нэс къэзыщэчыхэрэм якуп ар щыбэнагъ ыкIи текIоныгъэр къыщыдихыгъ. КIалэр зыгъасэрэр Хьабэхъу Адам. Джащ фэдэу Къанэкъо Салимрэ (Мыекъуапэ) Шъхьэлэхъо Долэтрэ (Адыгэкъал) тыжьын медальхэр къахьыгъэх. Къэрэбаш Заурбый, Максим Кураевыр, Магомед Батиевыр, Шъэумэн Якъуб, Нач Салбый ыкIи Юрий Залознэр ящэнэрэ хъугъэх.
