ИскусствэхэмкIэ колледжэу Тхьабысымэ Умарэ ыцIэ зыхьырэр зызэхащагъэр илъэс 65-рэ зэрэхъурэм фэгъэхьыгъэ мэфэкI Iофтхьабзэ республикэ филармонием щыкIуагъ. Ащ хэлэжьагъэх АР-м иминистрэхэм я Кабинет и Тхьаматэ игуадзэу, финансхэмкIэ министрэу Виктор Орловыр, культурэмкIэ министрэу Аулъэ Юрэ, АР-м и Концерт ыкIи Театральнэ зэхахьэхэм ялIыкIохэр.

Колледжым иIофшIэн 1960-рэ илъэсым ригъэжьагъ. Культурэмрэ искусствэмрэ апае IофышIэхэр зыгъэхьазырырэ еджа­пIэу мы зыр ары Адыгэ Республикэм итыр. Ар загъэпсыкIэм, инструментальнэ отделение заул ныIэп иIагъэр, непэ студент 300-м ехъум ащ гъэсэныгъэ щагъоты ыкIи лъэныкъо 12-кIэ ахэр рагъаджэх. Илъэс 65-у еджапIэр зылажьэрэм нэбгырэ мини 5-м ехъу щагъэхьазырыгъ. Ащ къычIитIупщыгъэхэр культурэм цIэрыIо щыхъугъэх, искусствэхэмкIэ кIэлэцIыкIу еджапIэхэм, творческэ купхэм ащэлажьэх. Темыр Кавказым ит еджэпIэ анахь лъэшхэм колледжыр ахэхьэ. Ащ фэдэ лъэгапIэ ар нэсыным лъапсэ фэзышIыгъэхэм ащыщ иапэрэ пэщагъэу Ахэджэго Щэбан. Джы непэ ащ ипащэр Куфэнэ Щамсэт, мы колледжым щеджагъэхэм ар ащыщ.
— АпэрэмкIэ, АР-м и ЛIышъхьэу КъумпIыл Мурат, культурэмкIэ министрэу Аулъэ Юрэ «тхьашъуегъэпсэу» ясIо сшIоигъу тиеджапIэ IэпыIэгъушхо къызэрэратырэмкIэ. Колледжыр илъэс 65-рэ хъугъэу зылажьэрэм ащ къычIигъэкIыгъэхэр ары непэ культурэм ыкIи искусствэм алъэныкъокIэ республикэм щылажьэхэрэр. Пшъэрылъ шъхьаIэу тиIэр искусствэм, культурэм зищыIэныгъэ езыпхы зышIоигъо ныбжьыкIэхэм сэнэхьат ядгъэгъотыныр ары. Колледжым иветеранхэм, икIэлэегъаджэхэм, истудентхэм мэфэкIымкIэ сафэгушIо, — къы­Iуагъ Куфэнэ Щамсэт.
ЗимэфэкIхэм АР-м и ЛIышъхьэу Къум­пIыл Мурат ыцIэкIэ къафэгушIуагъ министрэхэм я Кабинет и Тхьаматэ игуа­дзэу Виктор Орловыр.
— Адыгеим ит еджэпIэ анахь дэгъу­хэм искусствэхэмкIэ колледжыр ахэхьэ. Искусствэм хэхъоныгъэ езыгъэшIырэ специалистхэр мыщ къычIегъэкIых, лъэ­бэкъушIухэр ешIых. Лъэпкъ культурэм икъэухъумэн дэлажьэ, шIэныгъэ проект ыкIи гъэсэныгъэ гухэлъ зэфэшъхьафхэр щыIэныгъэм щыпхырещых. Колледжым икIэлэегъаджэхэм, истудентхэм сигуапэу сафэгушIо, — къыIуагъ Виктор Орловым.
ЕджапIэм иIофышIэхэм ащыщхэм «АР-м культурэмкIэ изаслуженнэ IофышI» зыфиIорэ щытхъуцIэр афагъэ­шъошагъ: Татьяна Хуснияровам, Светлана Стефаненко, Сихъу Анастасие. Джащ фэдэу IофышIэ чанхэу Сихъу Саидэ, Андрей Полун, Светланэ Яшниковам, Ангелина Лаутеншлегер Адыгэ Республикэм культурэмкIэ и Министерствэ ищытхъу тхылъхэр аратыгъэх.
ИскусствэхэмкIэ Адыгэ республикэ колледжым щылажьэхэрэм IэпэIэсэныгъэшхо ахэлъэу студентхэр рагъаджэх. ЧIыпIэ зэфэшъхьафхэм колледжым истудентхэм концертхэр къащаты, зэнэ­къо­къубэхэм ахэлажьэх, творческэ гъэ­хъагъэхэр яIэх.
Искусствэм ылъэныкъокIэ IэпэIэсэныгъэшхо зыхэлъ цIыфхэр зыщагъэхьазырырэ гупчэу колледжыр плъытэныр къылэжьыгъ. АР-м икультурэ хэхъоныгъэ зэрэригъэшIырэм фэшI республикэм итын шъхьаIэу «Адыгеим и Щытхъузехь» зыфиIорэр 2021-рэ илъэсым къыфагъэшъошагъ.
МэфэкI Iофтхьабзэр концерткIэ аухыгъ.
Лъэпшъыкъо
Фатим.